ქვეყანაში ხდება სახელმწიფო ინსტიტუტების სრული ჩამოშლა და ეროზია - აცხადებს ზურაბ ჭიაბერაშვილი.
„ევროპული საქართველოს“ ერთ-ერთი ლიდერის ზურაბ ჭიაბერაშვილის თქმით, პანკისის ხეობაში ხელისუფლების ქმედებამ ხალხს აჩვენა, რომ პოლიცია ხელისუფლების ბრძანებით იცავდა არა ხალხის ინტერესებს, არამედ ბიძინა ივანიშვილისა და მისი გარემოცვის ბიზნესს.
„გუშინ, სამწუხაროდ, გახარიას სახით ვიხილეთ ჩამოშლილი და გაუბედურებული სახელმწიფო ინსტიტუტები, რომელსაც ერთი მხრივ არ შეუძლია, საკუთარ მოქალაქეებთან დიალოგის წარმართვა , ახსნა-განმარტებების მიცემა, კომუნიკაცია და მეორე მხრივ, პოლიციასა და რიგით პოლიციელებს აძლევს სრულიად გაუაზრებელ, არაკომპეტენტურ და არაპროფესიონალურ დავალებებს, რისი შედეგიც არის ის, რომ ხალხში არის უსამართლობის განცდა, რომ სახელმწიფო ინსტიტუტები ემსახურებიან არა ხალხს და მოქალაქეებს, არამედ, ემსახურებიან ბიძინა ივანიშვილს და მისი გარემოცვის კერძო ინტერესებს. მეორე მხრივ, ვხედავთ სრულიად მიუღებელ ძალადობას პოლიცილების მიმართ, რაც ასევე დაუშვებელია და რაც ასევე მანიშნებელია, რომ ჩვენს ქვეყანაში ხდება სახელმწიფო ინსტიტუტების სრული ჩამოშლა და ეროზია“,- განაცხადა ჭიაბერაშვილმა.
პანკისის ხეობაში ვითარება 21 აპრილს დილით დაიძაბა, მას შემდეგ, რაც ადგილზე ჰესის მშენებლობა დაიწყო, რასაც მოსახლეობის პროტესტი მოჰყვა. შინაგან საქმეთა სამინისტრომ ხეობაში სპეციალური დანიშნულების რაზმის შეიყვანა. ადგილობრივები და სპეცრაზმელები ერთმანეთს რამდენჯერმე დაუპირისპირდნენ.
სამართალდამცავებმა მოსახლეობის წინააღმდეგ რეზინის ტყვიები და ცრემლსადენი გაზი გამოიყენეს, მოსახლეობა კი მათ ქვებს ესროდა. ადგილობრივებმა პოლიციის 2 მანქანა და ის ტრაქტორი დაწვეს, რომელიც ჰესის მშენებლობაზე მუშაობდა.
შეტაკებების დროს დაშავდა 55 ადამიანი. მათ შორის 38 პოლიციელს და 17 მოქალაქეს. 23 პოლიციელი თელავის საავადმყოფოებში ამ დრომდე რჩება. ვითარება მას შემდეგ განიმუხტა, რაც ხეობაში შინაგან საქმეთა მინისტრი გიორგი გახარია ჩავიდა. გახარია ხეობის უხუცესებსა და ადგილობრივ მოსახლეობას შეხვდა. მინისტრმა განაცხადა, რომ ჰესი მხოლოდ მაშინ აშენდება, როცა მოსახლეობის 90 პროცენტი თანახმა იქნება.
შინაგან საქმეთა მინისტრმა გიორგი გახარიამ დაშავებული პოლიციის თანამშრომლები მოინახულა და მათ ჯანმრთელობის მდგომარეობას ადგილზე გაეცნო. გახარიამ განაცხადა, რომ თითოეული ადამიანი იქნება იდენტიფიცირებული და ყველა, ვინც გაბედა პოლიციელზე თავდასხმა, იქნება შესაბამისად დასჯილი.
დღის ბოლოს შსს-მ პანკისის ხეობაში პოლიციელებზე თავდასხმისა და პოლიციის ტექნიკის დაზიანების ფაქტზე გამოძიება დაიწყო.