ხელისუფლებამ გონიერი გადაწყვეტილება მიიღო, როცა პრობლემის გადაჭრის გზად დიალოგი აირჩია, - აცხადებს საპარლამენტო უმრავლესობის წევრი, სოფო კილაძე პანკისის ხეობაში განვითარებულ მოვლენებთან დაკავშირებით.
მისი თქმით, ხელისუფლებამ გონიერი გადაწყვეტილება მიიღო, როცა პრობლემის გადაჭრის გზად დიალოგი აირჩია.
„მე მგონია, რომ ამ ბეწვის ხიდზე გვმართებს გონიერებას მთელ საზოგადოებას და რა თქმა უნდა, პასუხისმგებლობა ამ შემთხვევაში მაინც ხელისუფლების მხარეს არის. ჩვენი მიზანი არ არის საზოგადოება დავაპირისპიროთ ერთმანეთს. ან - საზოგადოება და ხელისუფლება იყოს დაპირისპირებული. პირიქით, ჩვენი მიზანი არის იყოს სიმშვიდე, გუშინ ნამდვილად ბეწვის ხიდზე გავიარეთ მაგრამ ვფიქრობ, გონიერებამ გაიმარჯვა და სწორად დალაგდა სიტუაცია. ხელისუფლება მაქსიმალურ კომუნიკაციაშია იქაურ მოსახლეობასთან და მგონია, რომ ეს გზა არის ყველაზე სწორი გზა- პრობლემების გადაჭრა დიალოგის გზით,“- განაცხადა სოფო კილაძემ.
პანკისის ხეობაში ვითარება 21 აპრილს დილით დაიძაბა, მას შემდეგ, რაც ადგილზე ჰესის მშენებლობა დაიწყო, რასაც მოსახლეობის პროტესტი მოჰყვა. შინაგან საქმეთა სამინისტრომ ხეობაში სპეციალური დანიშნულების რაზმის შეიყვანა. ადგილობრივები და სპეცრაზმელები ერთმანეთს რამდენჯერმე დაუპირისპირდნენ.
სამართალდამცავებმა მოსახლეობის წინააღმდეგ რეზინის ტყვიები და ცრემლსადენი გაზი გამოიყენეს, მოსახლეობა კი მათ ქვებს ესროდა. ადგილობრივებმა პოლიციის 2 მანქანა და ის ტრაქტორი დაწვეს, რომელიც ჰესის მშენებლობაზე მუშაობდა.
შეტაკებების დროს დაშავდა 55 ადამიანი. მათ შორის 38 პოლიციელს და 17 მოქალაქეს. 23 პოლიციელი თელავის საავადმყოფოებში ამ დრომდე რჩება. ვითარება მას შემდეგ განიმუხტა, რაც ხეობაში შინაგან საქმეთა მინისტრი გიორგი გახარია ჩავიდა. გახარია ხეობის უხუცესებსა და ადგილობრივ მოსახლეობას შეხვდა. მინისტრმა განაცხადა, რომ ჰესი მხოლოდ მაშინ აშენდება, როცა მოსახლეობის 90 პროცენტი თანახმა იქნება.
შინაგან საქმეთა მინისტრმა გიორგი გახარიამ დაშავებული პოლიციის თანამშრომლები მოინახულა და მათ ჯანმრთელობის მდგომარეობას ადგილზე გაეცნო. გახარიამ განაცხადა, რომ თითოეული ადამიანი იქნება იდენტიფიცირებული და ყველა, ვინც გაბედა პოლიციელზე თავდასხმა, იქნება შესაბამისად დასჯილი.
დღის ბოლოს შსს-მ პანკისის ხეობაში პოლიციელებზე თავდასხმისა და პოლიციის ტექნიკის დაზიანების ფაქტზე გამოძიება დაიწყო.