ინდოელმა მოქალაქემ განაცხადა, რომ საჩვენებელი თითი მას შემდეგ მოიჭრა, რაც გაიაზრა, რომ „არასწორ“ პოლიტიკურ პარტიას მისცა ხმა.
პავან კუმარმა თქვა, რომ მან შემთხვევით ხმა მისცა მმართველ პარტიას. აცხადებს რომ სურდა ხმა მიეცა რეგიონალური პარტიისთვის, მაგრამ საარჩევნო მანქანებზე არსებულმა უამრავმა სიმბოლომ დააბნია და არჩევანი შეცდომით გააკეთა. პავან კუმარმა საკუთარი ხმა ხუთშაბათს, ჩრდილოეთის შტატში, უტარ პრადეშში დააფიქსირა.
„მე მინდოდა ხმა მიმეცა სპილოსთვის, მაგრამ შემთხვევით ჩემი ხმა ყვავილმა მიიღო“, -განაცხადა ინდოელმა პავან კუმარმა.
ინდოეთის არჩევნებში ლოტუსის სიმბოლო მმართველ პარტიას აღნიშნავს, ხოლო სპილო, რეგიონალურ პარტიას, რომელიც სხვა ორ ოპოზიციურ პარტიასთან ერთად კოალიციაშია.
შეგახსენებთ, რომ ინდოეთში მსოფლიოში ყველაზე ხანგრძლივი და მასშტაბური არჩევნები მიმდინარეობს. ამომრჩევლები ინდოეთის საკანონმდებლო ორგანოს, პარლამენტის ქვედა პალატის, „ლოკ-საბჰის“ მე-17 მოწვევის დეპუტატებს აირჩევენ.
ამჟამად, ინდოეთის მმართველი პარტია „სახალხო პარტიაა“, რომელსაც სხვაგვარად ბჰარატია ჯანატა ეწოდება. ქვეყანას კი პარტიის ლიდერი, პრემიერ-მინისტრი ნანენდრა მოდი მართავს. მოდის პარტია ქვეყნის სათავეში 2014 წლის არჩევნების შედეგად მოვიდა და 2019 წლის არჩევნებშიც გეგმავს გამარჯვებას.
„სახალხო პარტიისა“ და პრემიერ-მინისტრის ნარენდრა მოდის მთავარი კონკურენტი ინდოეთის ყველაზე დიდი და ხანდაზმული პოლიტიკური გაერთიანების „ინდოეთის ეროვნული კონგრესის“ ლიდერი რაჰულ განდია.