იოსებ ჟორდანიას სახელობის ადამიანის რეპროდუქციის ინსტიტუტის შენობა 2 მილიონ 500 ათასს დოლარად გაიყიდა. თბილისში, მერაბ კოსტავას 43-ში, სახელმწიფო ფილარმონიასთან ახლოს მდებარე შენობის მფლობელი შპს "სანი" გახდა.
აუქციონის პირობით, შენობის ახალი მფლობელი ვალდებულია, აღნიშნულ დაწესებულებას ფართი შვიდი თვის განმავლობაში უსასყიდლოდ დაუთმოს. ინსტიტუტის ხელმძღვანელობას საქართველოს მთავრობამ შესთავაზა ორი შენობა: პირველი მათგანი მდებარეობს დიღომში, რკინიგზის ახალი საავადმყოფოს ტერიტორიაზე, მეორე კი თევდორე მღვდლის ქუჩაზე.
ამასთან, იგეგმება პირველი კლინიკური, ე.წ. არამიანცის საავადმყოფოს ტერიტორიაზე მდებარე სახელმწიფო საკუთრებაში არსებული ჰოსპიტალური ნაგებობების სამედიცინო პროფილით პრივატიზება. აღსანიშნავია, რომ აღნიშნული ქონება გაიყიდება მხოლოდ აუქციონის წესით, პრივატიზების პროცესი ჩატარდება მაქსიმალურად გამჭვირვალედ და ნებისმიერ მსურველს საშუალება ექნება, მიიღოს მასში მონაწილეობა.