საფინანსო-საბიუჯეტო კომიტეტმა პარლამენტის რეგლამენტი დაიცვა და პარტია „ევროპული საქართველოს" მოთხოვნა - საკომიტეტო მოსმენაზე ეროვნული ბანკის პრეზიდენტის, კობა გვენეტაძის მოწვევის შესახებ წერილი ცენტრალურ ბანკს გასულ კვირას გაუგზავნა, - განაცხადა კომიტეტის თავმჯდომარემ, ირაკლი კოვზანაძემ პარლამენტის პლენარულ სესიაზე.
ირაკლი კოვზანაძე დეპუტატის, ირმა ნადირაშვილის განცხადებას გამოეხმაურა, რომელმაც სესიაზე პასუხი მოითხოვა, თუ რა ბედი ეწია „ევროპული საქართველოს" შესაბამის წერილობით მოთხოვნას, რომელიც საფინანსო-საბიუჯეტო კომიტეტს გაუგზავნეს. აღნიშნულ წერილში „ევროპული საქართველო" ეროვნული ბანკის პრეზიდენტის მოსვლას პარლამენტში ,„თიბისი ბანკის" საქმესთან დაკავშირებით ითხოვს.