ეკონომიკური კრიზისის პირობებში, არა მხოლოდ საქართველოში, არამედ მთელ მსოფლიოში უმთავარესი პრობლემა ბანკების მიმართ საკრედიტო დავალიანების დაფარვა გახდა. დასავლეთში, აშშ-სა და მსოფლიოს სხვა ქვეყნებში პრობლემის გადაწყვეტის ამოსავალ წერტილად კლიენტის ინტერესები გახდა. ბანკები ითვალისწინებენ იმ გარემოებას, რომ კრიზისი დროებითი მოვლენაა და, შესაბამისად, ზრუნავენ კლიენტების შენარჩუნებაზე. ავტორიტეტული კვლევითი ცენტრების ინფორმაციით, ფაქტობრივად, არ ხდება კლიენტის საწინააღმდეგო ქმედებების განხორციელება. მეტიც, სამომხმარებლო კრედიტებთან დაკავშირებით რიგ შემთხვებში ხდება მათი ჩამოწერა ან თავისუფალი გრაფიკის მორგება. რაც შეეხება იპოთეკურ კრედიტებს, ბანკები, ფაქტობრივად, სრულად ემორჩილებიან კლიენტის შემოთავაზებულ წინადადებებს, რაც ერთ კლიენტთან მიმართებაში სულ მცირე, სამი ვარიანტის განხილვას ითვალისწინებს. თუნდაც აშშ-ისა და დასავლეთის მთელი რიგი ქვეყნების ბანკებმა ყველა სახის ვადაგადაცილებულ კრედიტზე შეწყვიტეს საურავების დარიცხვა, რათა უფრო არ დაამძიმონ კლიენტების ისედაც რთული ვითარება. საქართველოში მოქმედ ბანკებს კლიენტებთან დამოკიდებულებისა და კონკრეტული პროცედურების შესახებ ოფიციალური განცხადებები არ გაუკეთებიათ, თუმცა ყველა მათგანი აღიარებს, რომ ისინი თავიანთი მომხმარებლების ინტერესების დაცვაზე ზრუნავენ. ამავდროულად, მედიაში არაერთი მასალა მიეძღვნა კონკრეტულ ფაქტებს ბანკების წარმომადგენლებისა და კლიენტების ურთიერთობის შესახებ. თუმცა ირკვევა, რომ ხშირ შემთხვევაში ეს გარემოება წარმომადგენელთა ზედმეტ "მონდომებას" უკავშირდება და ბანკის ორიენტაციასთან და მის პრიორიტეტთან არავითარ კავშირში არ არის. მაგალითისთვის: "საქართველოს ბანკის" საზოგადოებასთან ურთიერთობის დეპარტამენტის მენეჯერი სოფო ბალავაძე "ჯი-ეიჩ-ენთან" საუბარში აცხადებს, რომ ბანკი მომხმარებელზეა ორიენტირებული და მის მიზანს კლიენტების მიერ გარანტიად ჩადებული ქონების რეალიზაცია არ წარმოადგენს.
_ მსოფლიო ფინანსურმა კრიზისმა შესაბამისი ასახვა პოვა მოსახლეობის გადახდისუნარიანობაზე. მნიშვნელოვანია იმ ადამიანების რაოდენობაც, რომელთაც პრობლემები აქვთ შექმნილი საკრედიტო დავალიანების დაფარვაში. როგორია ბანკის მიდგომა ამ კატეგორიის ადამიანებისადმი?
_ "საქართველოს ბანკი" მომხმარებელზე ორიენტირებული ბანკია და მუდმივად გვერდზე უდგას მის კლიენტებს, რადგან მათი ინტერესი ჩვენთვის პირიორიტეტულია. იმ შემთხვევაში, თუ ჩვენს მომხმარებელს შეფერხება ექმნება სესხის დაფარვის მხრივ, ყველა მათგანის შემთხვევას ინდივიდუალურად განვიხილავთ და ვუდგებით გვერდში, ისეთი შეღავათებით, როგორიცაა სესხის რესტრუქტურიზაცია.
_ საკმაოდ დიდია იმ ადამიანების რაოდენობაც, რომელთა საქმეები უკვე გადაცემულია, პრობლემური დეპარტამენტისთვის, დაფიქსირებულია არა ერთი შემთხვევა, როდესაც ამ ადამიანებს ემუქრებიან ბინებიდან გამოსახლებით, საქმეების სასამართლოში მიმართვით, რა გამოსავალი არსებობს ასეთი კლიენტებისთვის?
_ პირველ ყოვლისა, აღვნიშნავთ, რომ "საქართველოს ბანკი" მომხმარებელზე ორიენტირებული ბანკია და ჩვენთვის პრიორიტეტულია მომხმარებლის კმაყოფილება. ე. წ. პრობლემური სესხების მიმართულების მიზანი არაა, მოახდინოს მსესხებელს მიერ გარანტიად ჩადებული ქონების რეალიზაცია. ამ მიმართულების თანამშრომლები მოწოდებული არიან მომხმარებელს დაეხმარონ და კლიენტებთან ერთად იზრუნონ გამოსავლის მოძებნაში, თუ როგორ შეიძლება მოხდეს სესხის დაფარვა და ეს კი, პირველ ყოვლისა, გულისხმობს სესხის რეფინანსირების გზების მოძიებას. ბანკი მოწოდებულია დაუდგეს მის კლიენტებს გვერდში, რადგანაც ჩვენი კლიენტების კეთილდღეობა ბანკის სიძლიერეს განაპირობებს.
_ პრობლემური დეპარტამენტის წარმომადგენლები კლიენტებს არავითარ გამოსავალს არ უტოვებენ და სესხის დასაფარი თანხის ოდენობას უდგენენ თავად _ ან სრული მოცულობა, ან 50 პროცენტი, რომელიც იპოთეკუსი სესხის პირობებში საკმაოდ დიდი თანხაა, რომლის გადახდა კლიენტისთვის, ფაქტობრივად, შეუძლებელია. ეს დირექტივა მომდინარეობს თუ არა ბანკის ხელმძღვანელობიდან?
_ როგორც უკვე აღვნიშნეთ, ყოველი კლიენტის მდგომარეობა განსხვავებულია და გამოსავლის ძიებაც კლიენტთან ერთად მიმდინარეობს, მისი სიტუაციიდან გამომდინარე, მისი ინტერესებისა და შესაძლებლობების გათვალისწინებით. "საქართველოს ბანკის" თანამშრომლები კლიენტებთან ერთად ზრუნავენ საკითხის ოპტიმალური გადჭრის გზებზე.
_ როგორც ირკვევა, პრობლემური დეპარტამენტიდან საკრედიტო ოფიცერთან _ ე. ი. ბანკში საქმის დაბრუნება პრაქტიკულად შეიძლებელია, ყოველ შემთხვევაში, ასეთი განცხადებები კეთდება თავად საკრედიტო ოფიცრების და პრობლემური დეპარტამენტების წარმომადგენელთა მხრიდან. რანმდენად სწორია ეს გარემოება?
_ თუკი ადამიანი სესხს დაფარავს, რატომ არ უნდა ისარგებლოს საკრედიტო ოფიცრის მომსახურებით?! 120 დღის განმავლობაში ჩვენს მომხმარებელთან სესხის რესტუქტურიზაციის შესახებ მოლაპარაკებას აწარმოებს კრედიტოფიცერი. მხოლოდ ამ ვადის გასვლის შემდეგ უკვე საქმე გადაიგზავნება ე. წ. პრობლემურ დეპარტამენტში, სადაც უკვე უშალოდ კლიენტთან ერთად, მიდის სესხის დაფარვის კონკრეტული გზების ძიება, რა თქმა უნდა, რესტრუქტურიზაციის ფარგლებში. "საქართველოს ბანკისთვის" მთავარი პრინციპია მომხამრებლის კეთილდღეობა და ის, რომ ჩვენი კლიენტები უხერხულ მდოგმარეობაში არ ჩავაგდოთ.
_ "საქართველოს ბანკის" შემთხვევაში რას გულისხმობს სესხის რესტრუქტურიზაცია და რა კატეგორიის კლიენტებზე ვრცელდება იგი?
_ ეს გულისხმობს კლიენტისთვის იმ მომენტში, შექმნილი ვითარების გათვალისწინებით, უფრო მოხერხებული გადახდის სქემის შემუშავებას, რაც, ძირითადად, გამოიხატება ვადის გახანგრძლივებაში, ყოველთვიური გადასახდელი თანხის შემცირებაში და სხვა. "საქართველოს ბანკი" არ განასხვავებს მის მომხმარებლებს; ჩვენთვის ყველა კლიენტი მნიშნველოვანია.
"ჯი-ეიჩ-ენი", ესაუბრა გოჩა მირცხულავა
