საქართველოში ტურისტების მოსაზიდად ტურიზმის დეპარტამენტი ახალი აქციების მოწყობას იწყებს. 4 სექტემბერს, საქართველოში პირველად, "ყაზბეგის მარათონი" ჩატარდება, რომელშიც 150 ათლეტი მიიღებს მონაწილეობას.
"ყაზბეგის მარათონში" მონაწილეობის მისაღებად ათლეტები აშშ-იდან, პოლონეთიდან, ისრაელიდან, საფრანგეთიდან, შვეიცარიიდან და იაპონიიდან ჩამოვიდნენ.
ტურიზმის დეპარტამენტის თავმჯდომარის მაია სიდამონიძის განმარტებით, "ყაზბეგის მარათონი" ყოველწლიური ღონისძიება გახდება.
"ასეთი ღონისძიებების მოწყობა მნიშვნელობანია ქვეყანაში ტურიზმის განვითარებისთვის. გარდა ამისა, ასეთ ღონისძიებებს სოციალურ-ეკონომიკური დატვირთვაც აქვს", - განაცხადა სიდამონიძემ.
ტურიზმის დეპარტამენტის თავმჯდომარის მოადგილე ვახტანგ ასათაშვილი აცხადებს, რომ "ყაზბეგის მარათონი" სხვა ანალოგიური მარათონების თუ ღონისძიებების საქართველოში ჩატარების წინაპირობა გახდება.
"ყაზბეგის მარათონის" ჩატარება მნიშვნელოვანი ფაქტორია, თუკი მას სისტემატიური ხასიათი მიეცემა. მარათონი მომავალ წელსაც გაიმართება, მანამდე ამ მიმართულებით პრომოუშენი უფრო გაძლიერდება, რათა "ყაზბეგის მარათონში" მონაწილე ქვეყნებისა და ათლეტების რაოდენობა მაქსიმალურად გაიზარდოს", - განაცხადა ასათაშვილმა.
უკვე ცნობილია, რომ 2011 წელს "ყაზბეგის მარათონი" 10 სექტემბერს ჩატარდება.
4 სექტემბერს "ყაზბეგის მარათონი" დილის 10:00 საათზე დაიწყება. იგი 3 დისტანციაზე გაიმართება: 42 კმ, 21 კმ და 6 კმ. მარათონი სტარტს აიღებს ყაზბეგის რაიონში, სტეფანწმინდაში, გაივლის სოფელებზე: არშა, გარბანი, სიონი, სნო, გერგეთი და დასრულდება სტეფანწმინდაში.
დეპარტამენტის ინფორმაციით, ბოლო წლებში, მარათონელ მოგზაურთა რიცხვმაც მნიშვნელოვნად იმატა. ასეთი სახის მარათონები იმართება მსოფლიოს ბევრ ქვეყანაში და ისინი დიდი პოპულარობით სარგებლობს. ტურიზმის დეპარტამენტის ინფორმაციით, "ყაზბეგის მარათონიც" სწორედ ასეთი ტიპის მარათონს განეკუთვნება
