საქართველოში ელექტრომობილების აწყობა მოხდება. როგორც საქართველოს პრემიერ-მინისტრმა „მწვანე პოლიტიკის” სამოქმედო გეგმის იმპლემენტაციის პირველი ეტაპის „მწვანე პოლიტიკა -ეკოტრანსპორტი” პრეზენტაციაზე განაცხადა, ქარხნის აშენების მიზნით, მოლაპარაკებები ორ ყველაზე ცნობილ ბრენდთან უკვე მიმდინარეობს.
პრემიერმა აღნიშნა, რომ მთავრობამ შეიმუშავა გეგმა, რომლის მიხედვითაც შემდეგი 10 წლის განმავლობაში ქვეყანაში მოქმედი ავტოპარკის 90%-ი ელექტრომობილებით შეიცვლება. ამასთან, მისი თქმით, ამოქმედდება სალიზინგო სქემა, რომლის მიხედვითაც მომხმარებელი შეიძენს ელექტროავტომობილს და საწვავიდან დანაზოგი სახსრების მეშვეობით, 5-წლიან ვადაში გამოისყიდის ავტომობილს. ასევე, გაიზრდება უპირატესობა განბაჟების კუთხითაც.
„ბუნებრივია, ეს ქმნის მნიშვნელოვან უპირატესობებს. ეს ნიშნავს, რომ საქართველოში გაგვიჩნდება საკმაოდ მსხვილი ბაზარი. ჩვენ უკვე ვაწარმოებთ ორ ყველაზე ცნობილ ბრენდთან მოლაპარაკებას, რომ საქართველოში აშენდეს ელექტრომობილების ქარხანა“, – განაცხადა მამუკა ბახტაძემ.
