აფგან მუხთარლის საკითხი აზერბაიჯანელ და ქართველ მაღალჩინოსნებთან განვიხილეთ,- ამის შესახებ აშშ-ის სახელმწიფო მდივნის თანაშემწის მოადგილე ჯორჯ კენტმა თბილისში გამართულ პრესკონფერენციაზე განაცხადა.
მისი თქმით, აფგან მუხთარლის გატაცება მნიშვნელოვნად სცდებოდა იმ მოლოდინებს, რომლებიც ევროკავშირსა და ნატო-ში გაწევრიანების მსურველ ქვეყანას შეეფერება.
„აშშ იცავს ჟურნალისტების უფლებებს, რათა მათ განახორციელონ თავიანთი საქმიანობა. ჩვენთვის ყოველთვის შეშფოთების საგანია, როდესაც ჟურნალისტი უჩინარდება ან მას იჭერენ. იმედია, მთავრობის წარმომადგენლები იაზრებენ, რომ მომხდარი მნიშვნელოვნად სცდებოდა იმ მოლოდინებს, რომლებიც ევროკავშირსა და ნატო-ში გაწევრიანების მსურველ ქვეყანას შეეფერება. ეს გაერთიანება ღირებულებებზეა დამოკიდებული და ამ ღირებულებებში გათვალისწინებულია მედიის თავისუფლების პატივისცემა”, - განაცხადა ჯორჯ კენტმა.
