"ქრისტიან-დემოკრატები" მთავრობას ძალოვანი ვეტერანების პენსიების გათანაბრებასა და მეორე მსოფლიო ომის მონაწილეებისათვის შეღავათების აღდგენას თხოვენ. ამასთან დაკავშირებით განცხადება დღეს პარლამენტში გამართულ ბრიფინგზე "ქრისტიან-დემოკრატების" წარმომადგენელმა გიორგი ახვლედიანმა გააკეთა.
მისი თქმით, ამ საკიტხერბთან დაკავშირებით, ხვალ 10 ნოემბერს, 13:00 საათზე, ჯანდაცვის სამინისტროსთან გამაფრთხილებელი აქცია გაიმართება.
როგორც ახვლედიანმა აღნიშნა, "ქრისტიან-დემოკრატიული" მოძრაობის დაჟინებული მოთხოვნის მიუხედავად, 100 ათასამდე ადამიანის უსამართლო ყოფის გასაუმჯობესებლად მთავრობამ ბიუჯეტში ერთი თეთრიც არ გაითვალისწინა.
ახვლედიანის განმარტებით, საუბარია ძალოვანი სტრუქტურების ვეტერანებსა და ომისა და შეიარაღებული ძალების ვეტერანთა პრობლემებზე. მისი თქმით, "ქრისტიან დემოკრატები" მთავრობას სთხოვენ რომ სამართლიანობის აღსადგენად უნდა მოხდეს ძალოვანი ვეტერანებისათვის ღირსეული პენსიების დამსახურებისამებრ გათანაბრება.
"ეს კი იმ შემთხვევაში იქნება შესაძლებელი თუ შესაბამის კანონში მოხდება გადაანგარიშების მუხლის აღდგენა. მეორე მოთხოვნა კი შეეხება ომის ვეტერანებისათვის ადრე არსებული შეღავათების არდგენას. გამომდინარე იქიდან, რომ 2010 წლის ბიუჯეტის დამტკიცებამდე სულ ცოტა დრო რჩება, ხოლო ხელისუფლების მხრიდან პრობლემის მოგვარებისათვის საჭირო პოლიტიკური ნება არ ჩანს, ამ უმწვავესი საკითხის მთავრობისათვის შეხსენების მიზნით ხვალ ჯანდაცვის სამინისტროსთან 13:00 საათზე ქრისტიან დემოკრატები ვეტერანებთან ერთად გავმართავთ გამაფრთხილებელ საპროტესტო აქციას მოთხოვნით, შეიცვალოს ხელისუფლების პოლიტიკა და აღდგეს სამართლიანობა ძალოვანი სტრუქტურებისა და ომის ვეტერანთა მიმართებაში, რაც ბიუჯეტში კონკრეტული მუხლების აღდგენით და თანხების გათვალისწინებით იქნება შესაძლებელი", - აცხადებს გიორგი ახვლედიანი.
