ქართველმა ბიზნესმენებმა ეკონომიკისა და მდგრადი განვითარების მინისტრისგან საყვედური მიიღეს. როგორც ვერა ქობალიამ განმარტა, ის დღეს იმყოფებოდა ამერიკის მთავრობის ორგანიზებით მოწყობილ სემინარზე, რითაც ამერიკული მხარე ქართულ კომპანიებს ამერიკის ბაზარზე შეღწევაში ეხმარება, თუმცა დარბაზი ნახევრად ცარიელი იყო.

 "მე დღეს ვიყავი სემინარზე, სადაც ნახევრად ცარიელი დარბაზი იყო და მაინტერესებს ჩვენი ქართველი ბიზნესმენებისთვის 9 საათი იყო ძალიან ადრე თუ უბრალოდ, მათ ეს თემა არ აინტერესებდათ. თუ ასე ვიმუშავეთ შედეგს ვერ მივაღწევთ. იმედი მაქვს, რომ სემინარი როდესაც ქუთაისსა და ბათუმში გაიმართება, დასწრება იქნება სრულფასოვანი და ქართველი ბიზნესმენებისთვის სამუშაო დღე 12 საათზე ადრე დაიწყება", - განაცხადა ვერა ქობალიამ.

 შეგახსენებთ რომ ამერიკის მთავრობის ინიციატივით სემინარი 21-26 ივლისის ჩათვლით იმართება, საიდანაც პირველი ნაწილი დღეს თბილისში გაიხსნა, ხოლო მომდევნო დღეებში სემინარი ქუთაისსა და ბათუმში გაიმართება, სადაც ქართველ ექსპორტიორ კომპანიებს ამერიკის ბაზრის სტანდარტებს გააცნობენ და ასწავლიან იმასაც, თუ როგორ უნდა მოქცეს ქართული ბიზნესი ამერიკის ბაზარზე შესასვლელად.