ხვალ, 21 ივლისს, 12:00 საათზე, თიბისი ბანკის სათავო ოფისში USAID-ის მისიის დირექტორი ჯონათან კონლი, საქართველოს შრომის, ჯანმრთელობისა და სოციალური დაცვის მინისტრი ალექსანდრე კვიტაშვილი, თიბისი ბანკის გენერალური დირექტორი ვახტანგ ბუცხრიკიძე და ბლოკ ჯორჯიას გენერალური დირექტორი მამუკა ჯანაშვილი მონაწილეობას მიიღებენ სესხის გარანტიის შეთანხმების ხელმოწერის ცერემონიაში.
აშშ-ის საერთაშორისო განვითარების საგენტო (USAID-) აცხადებს თიბისი ბანკისთვის სესხის გარანტიის გადაცემას, რაც უზრუნველყოფს ბლოკ ჯორჯიასთვის გამიზნული 8 მილიონი აშშ დოლარის ოდენობის სესხის გაცემას.
USAID-იქნება თიბისი ბანკის მიერ ბლოკ ჯორჯიასთვის გაცემული 8 მილიონი აშშ დოლარის სესხის გარანტორი. სესხის თანხით ბლოკ ჯორჯია ქუთაისის სამედიცინო ცენტრს დაუმატებს ახალ, 120-საწოლიან ფლიგელს, ასევე გაარემონტებს და აღჭურვავს დასავლეთ საქართველოში არსებულ მცირე და საშუალო ზომის რვა საავადმყოფოს. ბლოკ ჯორჯიას გეგმის მიხედვით, 2011 წლის დეკემბრისთვის წყალტუბოს, აბაშის, ხობის, ჩხოროწყუს, წალენჯიხის, მესტიის, მარტვილისა და ფოთის მოსახლეობას მოემსახურება თანამედროვე, მაღალი ხარისხის, ახლადაშენებული ან გარემონტებული სამედიცინო დაწესებულებები.
სესხის გარანტია გაიცემა ქართველი ხალხისათვის ამერიკის მთავრობის მიერ კონფლიქტის შემდეგ დაპირებული ერთი მილიარდი დოლარის ოდენობის დახმარების ფარგლებში. აღნიშნული პროექტი წარმოადგენს USAID--ის ხანგრძლივი მცდელობის ნაწილს მთელი ქვეყნის მოსახლეობა უზრუნველყოს ხარისხიან სამედიცინო მომსახურებაზე ხელმისაწვდომობით.