სათამაშო ბიზნესის მოსაკრებელი თითქმის ორჯერ გაზრდას ბიზნესი აკრიტკებს. როგორც დღეს პარლამენტში საფინანსო საბიუჯეტო კომიტეტის სხდომაზე სატამაშო ბიზნესის წარმომადგენლებმა განაცხადეს, ასეთ პირობებში მოსალოდნელია სათამაშო აპარატების რაოდენობის განახევრება. არადა მოსაკრების ზრდით მთავრობა საშემოსავლოს ზრდას უკავშირებდა.
"სათამაშო ბიზნესის მოსაკრებლის შესახებ" საქართველოს კანონში შესატანი ცვლილებების მიხედვით, თითოეულ სათამაშო აპარატზე მოსაკრებლის რაოდენობა 1500-დან 3000 ლარამდე იქნება, ხოლო ტოტალიზატორზე, ბინგოსა და ლოტოს თითოეულ სალაროზე გადასახდელი კვარტალში 3 750-დან 7 500 ლარამდე. მოსაკრებლის ოდენობას ყოველი თვითმმართველი ერთეული თავად განსაზღვრავს.
ფინანსთა მინისტრის მოადგილის, ირაკლი სირაძის განცხადებით, წარმოდგენილი კანონპროექტის მიხედვით, სახელმწიფო ბიუჯეტის შემოსავლები მნიშვნელოვნად გაიზრდება. მისი თქმით, თუ აქამდე წლიური შემოსავალი 25 მლნ. ლარს შეადგენდა, მომავალში მოსალოდნელია მისი 33 მლნ. ლარამდე გაზრდა.
მსჯელობის საგანი იყო კანონპროექტის ამოქმედების თარიღიც. კანონპროექტის მიხედვით, მისი ამოქმედება 2010 წლის 1 სექტემბრიდან იგეგმება. გამოითქვა მოსაზრება, რომ შესაბამისმა ბიზნეს-სექტორმა ცვლილებებზე რეაგირება რომ მოახდინოს, ამისათვის გარკვეული ვადაა საჭირო, კანონპროექტით განსაზღვრულ დროში კი ამის მიღწევა გაძნელდება. გადაწყდა, რომ ამ საკითხზე სამინისტროში კონსულტაციები გაიმართება.
მასალის გამოყენების პირობები