უძრავი ქონების გაყიდვით მიღებული შემოსავლით დაბეგვრის საკითხი ღიადაა დარჩენილი. ამის შესახებ განცხადება ფინანსთა მინისტრის მოადგილემ ირაკლი სირაძემ დღეს პარლამენტში საფინანსო საბიუჯეტო კომიტეტის სხდომაზე გააკეთა, სადაც მეორე მოსმენით განიხილეს ახალი საგადასახადო კოდექსის პროექტი.
პროექტის თანახმად, უძრავი ქონების რეალიზაციისას, თუკი ნამატი აღემატება 30 ათას ლარს, იგი დაიბეგრება საშემოსავლო გადასახადით. აღნიშნულ ნორმას პარლამენტართა ნაწილი და არასამთავრობო სექტორი აკრიტიკებს და მიიჩნევს, რომ აღნიშნული ნორმა უძრავი ქონების გაძვირებას გამოიწვევს. ამასთან, მოხდება შემოსავლის დამალვაც. ისინი მიიჩნევენ, რომ ამ საკითხთან დაკავშირებით უნდა დარჩეს დღეს მოქმედი ნორმა, რომელიც ქონების რეალიზაციის შემოსავლის დაბეგვრას არ ითვალისწინებს, თუკი არ აღემატება 100 ათას ლარს. ეს მოთხოვნა დღეს საფინანსო-საბიუჯეტო კომიტეტის სხდომაზე კიდევ ერთხელ დაფიქსირდა.
ამ მოთხოვნას აქტიურად საპარლამენტო უმრავლესობის წარმომადგენელი გიორგი გოდაბრელიძე აყენებდა. ფინანსთა მინისრის მოადგილემ კი განაცხადა, რომ ამ საკითხთან დაკავშირებით ჯერჯერობით გადაწყვეტილება არ არის მირებული და შესაბამისად ხვალინდელ განხილვაზე საკითხს მეორე მოსმენით კენჭი აღნიშნული მუხლის გარეშე ეყრება. მუხლი შეთანხმდება მესამე მოსმენამდე.
როგორც დღეს საფინანსო-საბიუჯეტო კომიტეტის სხდომაზე ითქვა, ხვალინდელ განხილვაზე ღიად დარჩება დაახლოებით ათამდე მუხლი, რომელზედაც შეთანხმება ვერ მოხერხდება და ამ საკითხზე მთავრობასთან კონსულტაციები საკითხის მესამე მოსმენის მიღებამდე გაგრძელდება.
