საქართველოს ხელისუფლება ზემო ლარსის საბაჟო-გამშვებ პუნქტის ტერიტორიაზე უბაჟო საცალო ვაჭრობის (duty free) მოწყობას გეგმავს. პრეზიდენტის განკარგულების პროექტის თანახმად, უბაჟო საცალო ვაჭრობა საბაჟო-გამშვები პუნქტის ტერიტორიაზე, 500 მეტრიან სასაზღვრო, ზოლში დაიშვება.
აღნიშნულ საკითხზე საქართველოს მთავრობას 3 ივლის გამართულ მთავრობის სხდომაზე უნდა ემსჯელა, თუმცა საკითხის განხილვა მომავალი მთავრობის სხდომისთვის გადაიდო.
შეგახსენებთ, რომ ზემო ლარსის საბაჟო-გამშვებ პუნქტი 2010 წლის 1-ელ მარტს გაიხსნა. ეს იყო პირველი დიპლომატიური შეთანხმება, რომელიც საქართველო-რუსეთს შორის შუამავალი, შვეიცარიის საელჩოს მეშვეობით შედგა.
შეთანხმების თანახმად, გამშვები პუნქტები გახსნილი იქნება ყოველდღიურად, 1 მარტიდან 1 ნოემბრამდე პერიოდში - 6.00-დან 22.00 საათამდე, ხოლო 1 ნოემბრიდან 1 მარტამდე პერიოდში - 7.00-დან 19.00 საათამდე.
კლიმატური პირობების გათვალისწინებით, 1 ნოემბრიდან 1 მაისამდე, დაშვებულია გამშვები პუნქტების გავლით მისაბმელიანი და ნახევრადმისაბმელიანი სატვირთო ავტოსატრანსპორტო (სატრანსპორტო) და 30 ადგილზე მეტი რაოდენობის სამგზავრო სატრანსპორტო საშუალებების მოძრაობის შეზღუდვა.
გამშვებ პუნქტებზე აკრძალულია სახელმწიფო საზღვრის ფეხით გადაკვეთა.
ერთ-ერთი მხარის მიერ ავტოსატრანსპორტო საშუალების გატარებაზე უარის შემთხვევაში, მეორე მხარე ნებას მისცემს აღნიშნული ავტოსატრანსპორტო საშუალება დაუბრკოლებლად და დაუყოვნებლივ დაბრუნდეს საკუთარ ტერიტორიაზე.
"ყაზბეგი" (საქართველო) გამშვებ პუნქტზე არ გაიცემა საქართველოს ვიზები.
როგორც ცნობილია, ზემო ლარსის საბაჟო-გამშვები პუნქტი თავის დროზე რუსეთის გადაწყვეტილებით დაიხურა. მისი გახსნის ინიციატივა კი რამდენიმე თვის წინ ოფიციალურმა ერევანმა წამოჭრა.