საქართველოს ეროვნული ბანკის მონაცმებებით, 1-ლი მაისის მდგომარეობით, საქრთველოში მოქმედი კომერციული ბანკების მიერ ეროვნული ვალუტით გაცემული სესხების მოცულობა 6.2 პროცენტით, ანუ 79.9 მლნ ლარით გაიზარდა, ხოლო უცხოური ვალუტით გაცემული სესხების მოცულობა - 1.8 პროცენტით, ანუ 74.6 მლნ ლარით.
როგორც "ჯი-ეიჩ-ენს" სებ-იდან აცნობეს, რეზიდენტი იურიდიული პირებისათვის 2010 წლის აპრილის ბოლოს კომერციულ ბანკებს ეროვნული ვალუტით გაცემული ჰქონდათ 636.6 მლნ ლარის (წინა თვესთან შედარებით 7.7 პროცენტით ანუ 45.6 მლნ ლარით მეტი), ხოლო უცხოური ვალუტით - 2.5 მლრდ ლარის (შესაბამისად, 3.2 პროცენტით ანუ 78.2 მლნ ლარით მეტი) მოცულობის სესხი.
"იურიდიული პირების დაკრედიტების მთლიან მოცულობაში ყველაზე დიდი ხვედრითი წილი - 46.5 პროცენტი ვაჭრობის სფეროზე მოდის. წინა თვესთან შედარებით ვაჭრობის სფეროზე გაცემული სესხების მოცულობა 2.7 პროცენტით ანუ 39.1 მლნ ლარით გაიზარდა და 1.5 მლრდ ლარს მიაღწია", _ განმარტავენ სებ-ში.
მათივე ინფორმაციით, მრეწველობაზე გაცემული სესხების წილი იურიდიულ პირებზე გაცემული ვადიანი სესხების საერთო მოცულობაში 23.5 პროცენტს შეადგენს, რაც 2010 წლის 1 მაისისათვის 748.6 მლნ ლარით განისაზღვრა (10.5 პროცენტით ანუ 71.2 მლნ ლარით მეტი წინა თვესთან შედარებით); 10.8 პროცენტი მოდის მშენებლობაზე, რაც 344.2 მლნ ლარია (4.1 პროცენტით ანუ 14.8 მლნ ლარით ნაკლები, შესაბამისად). ამდენად, იურიდიული პირების დაკრედიტების საერთო მოცულობის 80.8 პროცენტი მხოლოდ სამ დარგზე - მრეწველობაზე, მშენებლობასა და ვაჭრობაზე მოდის.