საჯარო სამართლის იურიდიულ პირებს გრანტების გაცემის უფლება მიენიჭებათ. ამასთან დაკავშირებით ცვლილება შედის "გრანტების შესახებ" კანონში. კანონპროექტის ინიციატორი მთავრობაა ავტორი კი განათლებისა და მეცნიერების სამინისტრო.
კანონპროექტის თანახმად საჯარო სამართლის იურიდიულ პირებს მიეცემათ გრანტების გაცემის უფლება. კანონპროექტის განმარტებით ბარათში აღნიშნულია, რომ საჯარო სამართლის იურიდიულ პირებს შესაბამისი წესდებებით ისედაც გააჩნიათ ეს უფლება, რომ საკუთარი კომპეტენციის ფარგლებში გასცენ გრანტები, თუმცა ეს უფლებამოსილება კანონში არ არის გაწერილი, რაც განმარტებითი ბარათის თანახმად კანონმდებლობის ნორმების სხვადასხვა შინაარსით ინტერპრეტირების შესაძლებლობას იძლევა. კერძოდ, საგადასახადო კოდექსით დადგემილი შეღავათების სარგებლობის უფლებამოსილებას სხვადასხვა განმარტებებს აძლევდნენ. მას შემდეგ კი რაც გრანტების გამცემ სუბიექტთა შორის საჯარო სამართლის იურიდიული პირები უკვე კანონით ჩაერთვებიან კანონპროექტის ავტორები იმედოვნებენ, რომ კანონმდებლობის ნორმები ერთგვაროვნად იქნება ინტერპრეტირებული.
მთავრობის ამ ინიციატივის საკომიტეტო განხილვა პარლამენტმა უკვე დაიწყო. პირველი მოსმენით საკითხი დღეს საფინანსო საბიუჯეტო კომიტეტმა განიხილა და მხარიც დაუჭირა ყოველგვარი შენიშვნების გარეშე.
მასალის გამოყენების პირობები