დღეს, სასტუმრო "რედისონში" ყოველწლიური ნავთობის, გაზის, ენერგეტიკისა და ინფრასტრუქტურის მე-9 საერთაშორისო კონფერენცია G"IOGIE 2010" გაიხსნა. კონფერენციაში 15 ქვეყნის დელეგატი იღებს მონაწილეობას.
კონფერენცია საქართველოს ენერგეტიკის მინისტრმა ალექსანდრე ხეთაგურმა გახსნა, რომელმაც მიმდინარე და სამომავლო ენერგეტიკულ პროექტებზე, ენერგოუსაფრთხოებასა და ქვეყნის ენერგოპოტენციალზე ისაუბრა.
მინისტრმა განსაკუთრებული აქცენტი თურქეთთან დამაკავშირებელ ახალ ელექტროგადამცემ ხაზზე გააკეთა.
"ახალი ელექტროგადამცემი ხაზი 2012 წელს დაიწყებს ფუნქციონირებას, რის შემდეგაც ქვეყანას საშუალება ექნება ევროპულ ქვეყნებს, თურქეთის გავლით, ელექტროენერგია მიაწოდოს", - განაცხადა მინისტრმა.
ალექსანდრე ხეთაგურმა ასევე ისაუბრა საქართველო-რუსეთის ურთიერთობებზე და თანამშრომლობაზე ენერგეტიკულ სექტორში. მისი განმარტებით, რუსეთი და საქართველო არიან პარტნიორები ენერგეტიკულ სექტორში და საქართველო ელექტროენერგიის ექსპორტს და აღებული ვალდებულებების შესრულებას 2008 წლის აგვისტოს მოვლენების დროს და მას შემდეგაც განაგრძობს.
კონფერენციაზე ქვეყნის ენერგოსექტორში მიმდინარე პროექტებზე და არსებულ ვითარებაზე ისაუბრეს ენერგეტიკისა და გარემოს დაცვის მინისტრების მოადგილეებმა, კომპანია შSOCAღ-ის დირექტორმა, USAID-ის ენერგეტიკისა და გარემოს დაცვის ოფისის ხელმძღვანელმა, ნავთობისა და გაზის კორპორაციის წარმომადგენლებმა.
კონფერენციის ხაზგასმით აღინიშნა, რომ ასეთი შეხვედრები მნიშვნელოვნად შეუწყობს ხელს ქვეყნებს შორის მომავალ ურთიერთთანამშრომლობას ენერგეტიკულ სექტორში.
კონფერენციის პარალელურად მიმდინარეობს გამოფენა, რომელშიც რამდენიმე ენერგეტიკული კომპანია სტენდით არის წარმოდგენილი.
მე-9 საერთაშორისო კონფერენცია-გამოფენა ორ დღეს გაგრძელდება