"სამართლიანი საქართველოსთვის" ლიდერი ზურაბ ნოღაიდელი, რომელიც მოსკოვში იმყოფება ქართული, აფხაზური და ოსური დიასპორის წარმომადგენლებს შეხვდება.
როგორც "ჯი-ეიჩ-ენს" პარტიის პრესსამსახურიდან აცნობეს, ნოღაიდელი ქართველების, აფხაზებისა და ოსების შერიგებას აპირებს.
"მოსკოვში იმიტომ მივდივარ, რომ ასეთი შეხვედრა სხვაგან, უბრალოდ, ვერ შედგება. ამ მოლაპარაკებების თემატიკა შედარებით თავისუფალი და ზოგადი იქნება. რუსეთის დედაქალაქში გამართული შეხვედრები მკაცრად განსაზღვრული დღის წესრიგის გარეშე ჩაივლის", - აცხადებს ზურაბ ნოღაიდელი.
მისივე თქმით, ქართველებისა და აფხაზების, ქართველებისა და ოსების შერიგების, მათ შორის თანხმობის მიღწევის გარეშე საქართველოს გაერთიანება წარმოუდგენელია.
"ამ ეტაპზე აფხაზებთან პოლიტიკურ სტატუსზე ლაპარაკს აზრი არ აქვს, ვინაიდან აღნიშნულ საკითხზე მსჯელობის დაწყების აუცილებელ წინაპირობად ქართველებისა და აფხაზების შერიგება მიმაჩნია. აფხაზებთან მოლაპარაკებები უშედეგო იქნება, თუ პარალელურად რუსეთთან კონფრონტაცია გაგრძელდება", - აღნიშნულია ნოღაიდელის განცხადებაში.
გარდა ამისა, ზურაბ ნოღაიდელი პრიორიტეტულ ამოცანად ასახელებს ერთი მხრივ ქართველებს, მეორე მხრივ კი აფხაზებსა და ოსებს შორის სავაჭრო-სატრანსპორტო ურთიერთობების აღდგენას.
"საქართველომ უნდა მიიღოს სპეციალური კანონი, რომელიც აფხაზებთან და ოსებთან სავაჭრო ურთიერთობებს დაარეგულირებს. ზურაბ ნორაიდელის სამომავლო გეგმებში შედის აგრეთვე ცხინვალის რეგიონის რეაბილიტაციისთვის საინვესტიციო ფონდის შექმნა", - აცხადებს ქვეყნის ყოფილი პრემიერი.