დავით გამყრელიძე: მიუხედავად ჩვენი უარყოფითი დამოკიდებულებისა ირაკლი ოქრუაშვილთან, "ალიანსი საქართველოსთვის" ეკა ბესელიასთან, მაინც ითანამშრომლებს. ამის შესახებ "ახალი მემარჯვენეების ლიდერმა, დღეს პარტიის ოფისში გამართულ პრესკონფერენციაზე განაცხადა.
გამყრელიძემ "მოძრაობა ერთიანი საქართველოსთან" შესაძლო თანამშრომლობაზე ისაუბრა და აღნიშნა, რომ "ალიანსის' წევრები, მიუხედავად თავანთი შეხედულებისა ირაკლი ოქრუაშვილთან დაკავშირებით, მაინც აპირებენ ეკა ბესელიასთან კონსულტაციების გავლას.
"მიუხედავად იმისა, რომ ირაკლი ოქრუაშვილის წარსული ძალიან ბევრ შეკითხვებს ბადებს, მზად ვართ მოლაპარაკებების მაგიდაზე მოვიწვიოთ ეკა ბესელია. ბევრჯერ მითქვამს, რომ თუ ოქრუაშვილი საქართველოში ჩამოვა "მემარჯვენეები" მასთან არ ითანამშრომლებენ, მაგრამ სანამ, ოქრუაშვილი დევნილია მე მის უფლებებს ყოველთვის დავიცავ. ნოღაიდელის უფლებებსაც დავიცავ თუ იგი დევნილი გახდება", - განაცხადა გამყრელიძემ.
შეგახსენებთ, რომ ერთ-ერთი მიზეზი რის გამოც "ალიანსი საქართველოსთვის" ზურაბ ნოღაიდელთან არ თანამშრომლობს, ამ უკანასკნელის წარსულია - შეკითხვა, რომელსაც გამყრელიძემ უპასუხა, ირაკლი ოქრუაშვილთან მიმართებაში სწორედ ამ კონტექსტს შეიცავდა.