საქართველოს საგარეო საქმეთა სამინისტრო ოკუპირებულ ტერიტორიებზე სატელიტური გადაღებების წარმოების აუცილებლობაზე ისევ ალაპარაკდა.
როგორც უწყების ხელმძღვანელის მოადგილე ნინო კალანდაძემ დღეს ჟურნალისტებს განუცხადა, აღნიშნული დღის წესრიგში ოკუპირებულ ტერიტორიებზე გატაცებების ფაქტების გახშირების გამო დადგა.
"ამ ტერიტორიებზე სატელიტური გადაღებების შესახებ ინიციატივა ქართულ მხარემ დაახლოებით ნახევარი წლის წინ წამოაყენა, თუმცა ამ დრომდე ამის თაობაზე საუბარი არ ყოფილა", - განაცხადა კალანდაძემ.
მისივე განმარტებით, გადაღებების დაწყებისთვის ევროკავშირის წევრ სახელმწიფოებთან როგორც ტექნიკური, ისე ფინანსური საკითხების შეთანხმებაა აუცილებელი, რაზეც საუბარი უკვე დაწყებულია.
"სატელიტური გადაღებები ევროკავშირს შესაძლებლობას მისცემს მიიღოს ინფორმაცია უკონტროლო ტერიტორიებზე არსებული ვითარების შესახებ, სადაც ევროკავშირის სადამკვირვებლო მისიის წარმომადგენლებს დღემდე არ უშვებენ", - განმარტა მან.
