საფრანგეთის საგარეო დაზვერვის ყოფილი უფროსი ალენ ჟუილე რუსული პროპაგანდისტული ტელეკომპანიის Russia Today-ის წამყვანი გახდა. ამის შესახებ ინფორმაციას RFI-ი ავრცელებს.
როგორც იუწყებიან ჟუილე წაიყვანს გადაცემას, რომელიც გეოპოლიტიკურ საკითხებს მიეძღვნება
გადაცემა სახელწოდებით "La Source" (ფრანგ. "წყარო") თვეში ორჯერ გავა და მისი ქრონომეტრაჟი 13 წუთი იქნება.
Russia Today-ის ფრანგულენოვანი არხის მენეჯერის ქსენია ფიოდოროვას განცხადებით, ის ძალიან ბედნიერია, რომ ამ “რანგის ადამიანი“ რუსული ტელეკომპანიის რედაქციაში იმუშავებს.
გადაცემა ფოკუსირებული იქნება დიპლომატიის, კონფლიქტების, ტერორიზმის, უსაფრთხოებისა და დაზვერვის საკითხების შესახებ.
პირველი გადაცემის გაშვება მარტში იგეგმება.
თავად საგარეო დაზვერვის ყოფილმა ხელმძღვანელმა განაცხადა, რომ ამ გადაცემით, მაყურებელს მიეცემა საშუალება, იდეოლოგიური მოსაზრებების მიღმა, პრაქტიკულმა გეოპოლიტიკამ უკეთ დაანახოს ობიექტური რეალობა.
ალენ ჟუილეს არაერთხელ დაუფიქსირებია პროკრემლისტური პოზიციები. ის აქებდა რუსეთის სამხედრო შესაძლებლობებს და შესაძლებლობას არ უშვებდა ხელიდან, არ აღენიშნა, რომ რუსეთი დასავლეთისთვის საფრთხეს არ წარმოადგენს.
ჟუილე საფრანგეთის საგარეო დაზვერვას 2002 წელს ხელმძღვანელობდა.