ივანიშვილი წააგებს, მოუწევს ხელისუფლების დატოვება და ქვეყანა განვითარების გზაზე გავა, - განაცხადა ევროპული საქართველოს გენერალურმა მდივანმა, გიგი უგულავამ, რომელმაც ე.წ. მატროსოვის ციხიდან ტელეკომპანია პირველს სატელეფონო ინტერვიუ მისცა.
მისი თქმით, ივანიშვილთან შეუძლებელია თანამშრომლობა, რადგან ისეთი პირი გატეხა და ისე შეირცხვინა გინდა გარეთ და გინდა შიგნით, უბრალოდ მას პარტნიორები ვეღარ და აღარ ჰყავს.
მე შემიძლია, ნიძლავიც დავდო... გუშინ რაღაც კვლევებს ვუყურებდი, დაახლოებით, 2012 წლის შედეგით დასრულდება, ოღონდ პირიქით - ივანიშვილი წააგებს და მოუწევს ხელისუფლების დატოვება და ქვეყანა განვითარების გზაზე გავა. ხელისუფლების რესურსი თავის ყველაფრით, თავისი რეალური მომხრეებითა და თავისი ადმინისტრაციული რესურსით, არის სადღაც 35-37%, მაქსიმუმ, 40%-ის ფარგლებში და ერთიანი ოპოზიციის - სადღაც 55%-ის ფარგლებში. დაახლოებით, იგივე პროპორციით დაჯდება. იმავე შეცდომებს უშვებს ივანიშვილი და, შესაბამისად, იმავენაირად წააგებს. განსხვავება მხოლოდ ის არის, რომ მაშინ იდეა მაინც ჰქონდა ქვეყანას, რომელმაც სამწუხაროდ ფიასკო განიცადა, მაგრამ იდეა არასდროს კვდება. მაშინ ივანიშვილის ირგვლივ იყვნენ გაერთიანებულები ოპოზიციური ძალები, დღეს კი იდეას ჰყავს გაერთიანებული“, - თქვა უგულავამ.