ოზურგეთის მერია 8 მარტს 40 წარმატებულ ქალს საჩუქრად მიქსერს გადასცემს.
ოზურგეთის მუნიციპალიტეტში 2020 წლის 8 მარტის აღსანიშნავად ღონისძიების მოწყობის მომსახურების შესყიდვისთვის მერიამ ტენდერი უკვე გამოაცხადა.
"2020 წლის 8 მარტს, ქალთა საერთაშორისო დღისადმი მიძღვნილ ღონისძიებაზე უნდა განხორციელდეს საღამო-კონცერტი (ღონისძიების ორგანიზება), რომელშიც მონაწილეობას მიიღებენ ადგილობრივი შემოქმედებითი ჯგუფები და ინდივიდუალური შემსრულებლები.
ღონისძიება გაიმართება ოზურგეთის ტერიტორიაზე არსებულ საბანკეტო დარბაზში", -ვკითხულობთ შესყიდვის ტექნიკურ დავალებაში.
მერიის მოთხოვნით, ღონისძიების მსვლელობის დროს დასაჯილდოებელ 40 ქალს უნდა გადაეცეს ფასიანი საჩუქრები. სამზარეულო ტექნიკა მიქსერი სადგამითა და მეტალის ქვაბით (ქვაბის ზომა არანაკლებ 2 ლიტრისა. მიქსერი უნდა იყოს ახალი, ექსპლუატაციაში არმყოფი, მუშა მდგომარეობაში.
გარდა სამზარეულო ტექნიკისა, ოზურგეთის მუნიციპალიტეტის მერიის სურვილით, დაჯილდოებულ ქალებს ვარდების თაიგული გადაეცემათ.
თუ რატომ შეაჩერებს საჩუქრის შერჩევისას ყურადღება მიქსერზე, მერიის კულტურის სამსახურის უფროსი მარინა ჯაფარიძე, რუსთავი 2-თან საუბრისას, შემდეგნაირად პასუხობს:
"მიქსერის ჩუქება იმიტომ გადავწყვიტეთ, რომ ეს არის საოჯახო ნივთი და მისით ისარგებლებს ოჯახში მცხოვრები ყველა ადამიანი. საერთო სარგებლობის ნივთია და არა პირადი მოხმარების საგანი. წარმატებულ ქალებს ჩვენ სხვა საჩუქრებსაც ვუმზადებთ. მოეწყობა ღონისძიება, ფურშეტითა და კონცერტით, გადავცემთ თაიგულებს და მადლობის ბარათებს მათი წარმატებული საქმიანობისთვის".
შესყიდვის სავარაუდო ღირებულება 11 460 ლარია.
