აქტიურ პოლიტიკაში ჩავერთვები ამ რეჟიმის დასამარცხებლად. კონკრეტულად რომელ პარტიასთან ერთად გავაკეთებ ამას, ამასთან დაკავშირებით მჭირდება გარკვეული დრო, - განაცხადა ყოფილმა პრემიერმა და საქართველოს ყოფილმა შინაგან საქმეთა მინისტრმა ვანო მერაბიშვილმა ე.წ. მატროსოვის ციხიდან გამოსვლის შემდეგ.
მისი თქმით, ის ყველას შევხვდება და გადაწყვეტილებას შემდეგ მიიღებს.
"ძალიან მიხარია, რომ პრაქტიკულად მთელი ოპოზიცია არის ერთიანი. მე ვფიქრობ, ამ ერთიანობით დავამარცხებთ დღევანდელ რეჟიმს. კონკრეტულ პარტიებთან დაკავშირებით აქამდე განცხადებებს არ ვაკეთებდი, მე ვიყავი იზოლაციაში, ვიყავი ჩამოცილებული ყოველდღიურ პროცესებს, აქედან გამომდინარე, როგორც აქამდე ვერ ვაკეთებდი განცხადებებს, ისე დღეს არ შემიძლია განცხადების გაკეთება, რადგან ამ ხუთ წუთში, რაც გამოვედი საკნიდან, ჯერ არაფერი შეცვლილა.
ჩემი უახლოესი მეგობრები, თანამებრძოლები, თანაპარტიელები, ჩემდა სამწუხაროდ, დღეს სხვადასხვა პარტიაში არიან. მე ყველა მათგანს შევხვდები, ყველას აზრს გავეცნობი და მივიღებ გადაწყვეტილებას, რომელსაც ამ დასკვნებით გავაკეთებ.
მე მჭირდება გარკვეული დრო და ჟურნალისტებს გაძლევთ გარანტიას - როგორც კი ჩამოვყალიბდები, ამის შესახებ პირველ რიგში თქვენ გაიგებთ. აქტიურ პოლიტიკაში ჩავერთვები ამ რეჟიმის დასამარცხებლად. კონკრეტულად რომელ პარტიასთან ერთად გავაკეთებ ამას, ამასთან დაკავშირებით ყველას შევხვდები", - თქვა მერაბიშვილმა.