მსოფლიოში თითოეული ბავშვის მომავალი რისკის ქვეშ დგება, რადგან სახელმწიფოები ვერ ახერხებენ შეაფერხონ კლიმატის ცვლილებით გამოწვეული შედეგები და უზრუნველყონ სუფთა და ჯანსაღი გარემო, რომელიც აუცილებელია ბავშვთა კეთილდღეობისთვის.
ამის შესახებ გაეროს მასშტაბურ კვლევაზე დაყრდნობით Deutsche Welle წერს.
"კლიმატის ცვლილება, ეკოლოგიური დეგრადაცია, მოსახლეობის მიგრაცია, კონფლიქტი, უთანასწორობა და არაჯანსაღი ცხოვრების წესის პროპაგანდა საფრთხეს უქმნის ბავშვების ჯანმრთელობასა და მომავალს ყველა ქვეყანაში", - ნათქვამია მოხსენებაში, რომელიც ბავშვთა და მოზარდთა ჯანმრთელობის 40-ზე მეტი ექსპერტის ავტორობით მომზადდა.
ჯანმრთელობის მსოფლიო ორგანიზაციის, UNICEF- ისა და სამედიცინო ჟურნალის Lancet- ის ერთობლივი დასკვნით, განვითარებულ ქვეყნებში მცხოვრებ ბავშვებს განვითარების უკეთესი შანსები აქვთ, თუმცა ეს ქვეყნებიც ვერ ახერხებენ კლიმატის ცვლილების გამოწვევებს და ეკოლოგიურ საფრთხეებს სათანადოდ უპასუხონ.
"სახელმწიფოებმა უნდა შეიმუშაონ ბავშვთა და მოზარდთა ჯანმრთელობისადმი ადეკვატური მიდგომა, რათა უზრუნველყონ, დავიცვათ არა მხოლოდ ჩვენი შვილები არამედ ის სამყარო, რომელსაც ისინი მომავალში მიიღებენ მემკვიდრეობით", - განაცხადა კვლევის ავტორთა კომისიის ხელმძღვანელმა მოხსენების წარდგენისას.
მოხსენებაში ასევე მოცემულია კომერციული სექტორის მხრიდან ბავშვების მიმართ არსებული საფრთხეები, რაც ეხება ზიანის მომტანი საკვების რეკლამირებას, რაც ბავშვებში ჭარბწონიანობას უწყობს ხელს.
2016 წლის მონაცემებით, ჭარბწონიანი ბავშვებისა და მოზარდების რაოდენობა მსოფლიოში 124 მილიონამდე გაიზარდა, მაშინ როდესაც 1975 წელს ეს რიცხვი 11 მლნ-ს შეადგენდა.
"ბავშვები მოწყვლადები არიან "მოზრდილთათვის განკუთვნილი" პროდუქტების რეკლამირების მიმართ, როგორიცაა ალკოჰოლი, თამბაქო და აზარტული თამაში, რაც ზრდის მათი მოხმარების შანსებს", - აცხადებენ კვლევის ავტორები.
ჯანმრთელობის მსოფლიო ორგანიზაციის და Unicef-ის დაკვეთით მომზადებულ კვლევაზე 40 დამოუკიდებელი ექსპერტი მუშაობდა, რომელმაც ბავშვების მდგომარეობა 180 ქვეყანაში შეისწავლა.
