YouTube- ის დაარსების 15 წლის იუბილესთან დაკავშირებით, გამოცემა Newsweek-მა დაასახელა პლატფორმაზე სხვადასხვა დროს გამოქვეყნებული ყველაზე პოპულარული ვიდეორგოლები.
2005 წელს Youtube-ზე ყველაზე პოპულარული ბრაზილიელი ფეხბურთელის, რონალდინიოს ვარჯიშის ამსახველი ვიდეო გახდა. ეს ვიდეო პორტალიდან მალევე წაიშალა და მხოლოდ რამდენიმე წლის შემდეგ ატვირთეს კიდევ ერთხელ.
2006-2007 წლებში ყველაზე პოპულარული ვიდეო იყო "ცეკვის ევოლუცია", რომელშიც ჯადსონ ლეიპლი ექვსი წუთის განმავლობაში აჩვენებს XX საუკუნის ცეკვების მთავარ მოძრაობებს.
2008 წელს Youtube-ზე ყველაზე მეტი ნახვა მომღერალ ავრილ ლავინის ვიდეოკლიპმა Girlfriend დააგროვა.
2009 წელს არნახული პოპულარობა მოიპოვა ბრიტანულმა საოჯახო ვიდეომ, სადაც პატარა ბიჭი თავის უფროს ძმას თითზე კბენს. ეს იყო ერთ-ერთი არამუსიკალური ვიდეო, რომელმაც ნახვების რაოდენობით მოწინავე ადგილი დაიკავა პორტალზე გამოქვეყნებულ ვიდეოებს შორის.
მოგვიანებით, 2010 წელს, ამ ვიდეოს ლედი გაგას სახელგანთქმულ სიმღერაზე Bad Romance შექმნილმა ვიდეოკლიპმა გადაუსწრო.
2010-2011 წლებში რეკორდული რაოდენობის ნახვა დააგროვა ჯასტინ ბიბერის კლიპმა სიმღერაზე Baby.
2012 წელს სამხრეთ კორეელი მომღერლის Psy სიმღერისთვის Gangnam Style შექმნილმა ვიდეორგოლმა ყველა დროის რეკორდი მოხსნა და პირველი ვიდეო გახდა, რომელმაც მილიარდზე მეტი ნახვა დააგროვა.
2017 წელს Youtube-ზე გამოჩნდა ლუის ფონსისა და დედი იანკის სიმღერა Despasito, რომელსაც ამ დროისთვის 6,631,286,008 მნახველი ჰყავს.