საერთაშორიოსო საარბიტრაჟო ცენტრმა (GIAC) გაეროს საერთაშორისო ვაჭრობის სამართლის კომისიის (UNCITRAL) მე-3 სამუშაო ჯგუფის 39-ე სესიაში მიიღო მონაწილეობა. ცენტრის გენერალური მდივანი, ბექა ინჯია ჩართული იყო სამუშაო ჯგუფის მუშაობაში, რომელიც ინვესტორსა და სახელმწიფოების შორის საინვესტიციო დავების გადაწყვეტის რეფორმაზე მუშაობს. აღნიშნული შეხვედრის ფარგლებში საქართველოს საერთაშორისო საარბიტრაჟო ცენტრს საშუალება ჰქონდა პარტნიორებისთვის და სამუშაო ჯგუფის სხვა წევრებისთვის საკითხთან დაკავშირებით გაეცნო პოზიცია, რომელიც ცენტრის საერთაშორისო გამოცდილებაზეა დაფუძნებული.
“ სამუშაო ჯგუფის ფარგლებში განიხილება ინვესტორსა და სახელმწიფოს შორის სანვესტიციო დავების მექანიზმის რეფორმის რამდენიმე ვარიანტი მათ შორის არის საინვესტიციო საარბიტრაჟო გადაწყვეტილების გასაჩივრების ე.წ. ad hoc მექანიზმის ან საერთაშორისო საინვესტიციო სასამართლოს შექმნა. ამავე ჭრილში დისკუსიები იმართება ასეთი შესაძლო მექანიზმების დაფინანსების, არბიტრთა შერჩევის, მათი კვალიფიკაციის, გამოტანილი გადაწყვეტილების აღსრულებასთან დაკავშირებულ საკითხებზე. მნიშვნელოვანია, რომ საქართველოს საერთაშორისო საარბიტრაჟო ცენტრი არის ერთადერთი ორგანიზაცია რეგიონში, რომელიც გაეროს საერთაშორისო ვაჭრობის სამართლის კომისიის მუშაობაში დამკვირვებლის სტატუსით მონაწილეობს. უნდა აღინიშნოს, რომ ეს კიდევ ერთი წინ გადადგმული ნაბიჯია იმ მიზნისკენ, რაც რეგიონში ჩვენი ქვეყნის საარბიტრაჟო ჰაბად ჩამოყალიბებას გულისხმობს“ - აღნიშნავს საქართველოს საერთაშორისო საარბიტრაჟო ცენტრის გენერალური მდივანი ბექა ინჯია.
საქართველოს სავაჭრო-სამრეწველო პალატასთან არსებული, საქართველოს საერთასორისო საარბიტრაჟო ცენტრი (GIAC) გაეროს საერთაშორისო ვაჭრობის სამართლის კომისიაში (UNCITRAL) დამკვირვებლის სტატუსს 2018 წლიდან ფლობს. აღნიშნულ სამუშაო ჯგუფებში დამკვირვებლის სტატუსს ფლობენ ისეთი ორგანიზაციები, როგორიცა: ამერიკის არბიტრთა ასოციაცია/დავების მოგვარების საერთაშორისო ცენტრი (AAA/ICDR), ამერიკის ადვოკატთა ასოციაცია (ABA), საერთაშორისო სამართლის ამერიკული საზოგადოება (ASIL), საერთაშორისო დავების მოგვარების ცენტრი (CIDS), ჩინეთის საერთაშორისო ეკონომიკისა და ვაჭრობის არბიტრაჟის კომისია (CIETAC), ევროპის ვაჭრობის კონფედერაცია (ETUC), საერთაშორისო ადვოკატთა ასოციაცია (IBA), ტრანსნაციონალური არბიტრაჟის ინსტიტუტი (ITA), საერთაშორისო სავაჭრო პალატა (ICC), სტოკჰოლმის საარბიტრაჟო ინსტიტუტი (SCC), მსოფლიო ეკონომიკური ფორუმი (WEF) და სხვა.
