ავსტრალიაში სახანძრო თვითმფრინავის ჩამოვარდნას 3 ამერიკელი ემსხვერპლა.
ხანძარსაწინააღმდეგო ოპერაციაში მონაწილე თვითმფრინავის გაქრობის შესახებ ცნობა დღეს გავრცელდა.
ავსტრალიის ხელისუფლება იუწყებოდა, რომ კავშირი დაკარგა თვითმფრინავთან, რომელიც ახალი სამხრეთ უელსის შტატში ტყის ხანძრის ჩაქრობის ოპერაციაში მონაწილეობდა.
კატასტროფის გამომწვევი მიზეზები ამ დრომდე უცნობია.
ახალი სამხრეთ უელსის სახანძრო სამსახურის განცხადებით, ცოტა ხნის წინ, ამერიკელები დაუკავშირდნენ და ტყის ხანძრის ჩაქრობაში დახმარება შესთავაზეს.
შემთხვევა ავსტრალიის დედაქალაქ კანბერადან ორი საათის სავალ მანძილზე მოხდა.
ხანძრებმა ავსტრალიაში, რომელიც სექტემბრიდან მძვინვარებს, 28 ადამიანი იმსხვერპლა და 2000-ზე მეტი საცხოვრებელი სახლი გაანადგურა.
სიდნეის უნივერსიტეტის კვლევის მიხედვით, ავსტრალიაში ტყის ხანძრებს მილიარდამდე ცხოველი ემსხვერპლა.
ევროკავშირის კოპერნიკის მონიტორინგის პროგრამის ინფორმაციით, ხანძრის შედეგად ატმოსფეროში 400 მეგატონა ნახშირორჟანგი გამოიყო. ექსპერტების აზრით, ხანძრების უპრეცედენტო მასშტაბი და ინტენსივობა კლიმატის ცვლილებით არის განპირობებული.