უკრაინული თვითმფრინავის კატასტროფის შესახებ ირანის სამოქალაქო ავიაციის ორგანიზაციის მეორე ანგარიში ადასტურებს, რომ ლაინერი "ტორ-მ1"-ის საზენიტო-სარაკეტო კომპლექსის მოკლე მანძილზე მოქმედმა "მიწა-ჰაერის" ტიპის ორმა რაკეტამ ჩამოაგდო.
ანგარიშის თანახმად, რაკეტების მოხვედრის შემდეგ ბოინგმა, რომელიც საცხოვრებელი რაიონის ზემოთ მიფრინავდა, სიმაღლის დაკარგვა სწრაფად დაიწყო, რის შემდეგაც გასართობი პარკის კონსტრუქციას დაეჯახა და მიწაზე ჩამოვარდა.
ჩამოვარდნის შემდეგ ლაინერმა გადაკვეთა ფეხბურთის მოედანი, მთლიანად დაიშალა და დაიწვა.
"უკრაინის საერთაშორისო ავიახაზების" კუთვნილი სამგზავრო თვითმფრინავი Boeing 737, რომელიც თეირანიდან კიევს 8 იანვარს მიემგზავრებოდა, თეირანში, იმამ ხომეინის საერთაშორისო აეროპორტიდან აფრენიდან 2 წუთში ჩამოვარდა.
თვითმფრინავში 167 მგზავრი და ეკიპაჟის 9 წევრი იმყოფებოდა. ყველა მათგანი დაიღუპა. მათ შორის იყვნენ უკრაინის, ირანის, ავღანეთის, კანადის, დიდი ბრიტანეთის, გერმანიისა და შვედეთის მოქალაქეები.
დაღუპულია უკრაინის საერთაშორისო ავიახაზების ცხრა თანამშრომელი და ორი მგზავრი.
11 იანვარს, გამთენიისას, ირანის შეიარაღებული ძალების გენერალურმა შტაბმა აღიარა თვითმფრინავის ჩამოგდება და ამას ადამიანური შეცდომა უწოდა.