ავსტრალიის აღმოსავლეთ სანაპიროზე მოსულმა უხვმა ნალექმა წყალდიდობა გამოიწვია. შტატებში, სადაც ცოტა ხნის წინ დამანგრეველი ხანძარი მძვინვარებდა, ახლა წყალდიდობას ებრძვიან.
ძლიერმა წვიმამ და წყალდიდობამ განსაკუთრებით, ვიქტორიის, ახალი სამხრეთ უელსისა და ქუინსლენდის შტატები დააზარალა.
წყალდიდობის შედეგად ქუინსლენდის შტატში ფაქტობრივად ყველა ცენტრალური მაგისტრალი დაიხურა. ახლი სამხრეთ უელსის შტატში კი ელექტროენერგიის გათიშვა გამოიწვია.
ამავდროულად, სახანძრო-სამაშველოს სამსახურის წარმომადგენლები აცხადებენ, რომ უხვმა ნალექმა ხანძრის ძირითად კერების ჩაქრობა მოახერხა. როგორც იტყობინებიან, რამდენიმე დღის წინ არსებული ხანძრის 100 კერიდან ახლა მხოლოდ 75-ია აქტიური.
ხანძრებმა ავსტრალიაში, რომელიც სექტემბრიდან მძვინვარებს, 28 ადამიანი იმსხვერპლა და 2000-ზე მეტი საცხოვრებელი სახლი გაანადგურა.
სიდნეის უნივერსიტეტის კვლევის მიხედვით, ავსტრალიაში ტყის ხანძრებს მილიარდამდე ცხოველი ემსხვერპლა.
ევროკავშირის კოპერნიკის მონიტორინგის პროგრამის ინფორმაციით, ხანძრის შედეგად ატმოსფეროში 400 მეგატონა ნახშირორჟანგი გამოიყო. ექსპერტების აზრით, ხანძრების უპრეცედენტო მასშტაბი და ინტენსივობა კლიმატის ცვლილებით არის განპირობებული.
