საქართველოს პარლამენტში დღეს რიგგარეშე სხდომა გაიმართება. შესაბამისი განკარგულება საქართველოს პრეზიდენტმა სალომე ზურაბიშვილმა გამოსცა.
სხდომაზე კანონმდებლები, სხვა საკითხებთან ერთად, ნიკა მელიას ადგილმონაცვლის, ბადრი ბასიშვილის უფლებამოსილების საკითხს უყრიან კენჭს.
"ნაციონალური მოძრაობის" შეფასებით, ნიკა მელიას დეპუტატის მანდატი უკანონოდ ჩამოერთვა და ეს გადაწყვეტილება საკონსტიტუციო სასამართლოში გასაჩივრდა.
პარლამენტის რიგგარეშე სხდომას ბოიკოტს უცხადებენ ოპოზიციური პარტიები - "ერთიანი ნაციონალური მოძრაობა" და "ევროპული საქართველო".
საკანონმდებლო ორგანო საგაზაფხულო სესიას თებერვლის პირველ სამშაბათს, 4 თებერვალს გახსნის.