შეერთებული შტატების ელჩის მოვალეობის შემსრულებელი ელიზაბეთ რუდი ცხინვალის დე ფაქტო ხელისუფლებას ე.წ. გამშვები პუნქტების გახსნისკენ მოუწოდებს. აღნიშნული განცხადება ელიზაბეთ რუდმა, გუშინ, შიდა ქართლის რეგიონში, სოფელ ქვეშში ახალგარემონტებული საჯარო სკოლის გახსნის ცერემონიის შემდეგ გააკეთა.
მისი თქმით, მნიშვნელოვანია, ცხინვალის რეგიონში მცხოვრებმა ადამიანებმა შეძლონ სათანადო სამედიცინო დამხარების მიღება და ნორმალურ პირობებში ცხოვრება.
"ამერიკის შეერთებული შტატები კვლავ შეშფოთებით აკვირდება ცხინვალის რეგიონთან არსებული ადმინისტრაციული გამყოფი ხაზის მიმდებარედ სიტუაციის გაუარესებას, მიმდინარე „ბორდერიზაციის“ პროცესსა და ე.წ. გამშვები პუნქტის აღმართვას იმ ტერიტორიაზე, რომელსაც დიდი ხანია თბილისი აკონტროლებს.
აღნიშნული საკითხები ადმინისტრაციული გამყოფი ხაზის ორივე მხარეს მცხოვრები ადამიანების ჰუმანიტარულ მდგომარეობას აუარესებს. ჩვენ კიდევ ერთხელ მოვუწოდებთ ცხინვალის დე ფაქტო ხელისუფლებას, გახსნას ე.წ. გამშვები პუნქტები, რათა უზრუნველყოფილი იყოს გადაადგილების თავისუფლება და ჰუმანიტარულ დახმარებაზე წვდომა, ასევე, ცხინვალის რეგიონში მცხოვრებმა ადამიანებმა შეძლონ სათანადო სამედიცინო დამხარების მიღება და ნორმალურ პირობებში ცხოვრება", - თქვა ელიზაბეთ რუდმა.
