საქართველოს პრეზიდენტის ადმინისტრაცია უარყოფს გავრცელებულ ინფორმაციას, რომ სალომე ზურაბიშვილმა პირად დაცვას ჩოხა-ახალუხის ტარება მოსთხოვა.
ადმინისტრაციის ცნობით, გავრცელებული ინფორმაცია ცრუა და იგი მხოლოდ პრეზიდენტის ინსტიტუტის დისკრედიტაციას ემსახურება.
"ერთ-ერთმა ტელევიზიამ გაავრცელა ცრუ ინფორმაცია საქართველოს პრეზიდენტის მისამართით, რათა საზოგადოება შეცდომაში შეყვანოს და პრეზიდენტის ინსტიტუტის დისკრედიტაცია მოახდინოს. როგორც ჩანს, ფეიკ-ნიუსის ავტორებმა არ იციან რა განსხვავებაა პირად დაცვასა და საპატიო ყარაულს შორის.
ცერემონიების დროს ჩოხის გამოყენება არის ქართული ტრადიციების პატივისცემა, გარდა იმისა, რომ ეს ცრუ-ინფორმაცია ემსახურება პრეზიდენტის ინსტიტუტის დისკრედიტაციას, ის შეურაცხყოფს ეროვნულ ფასეულობებს და ქართულ ტრადიციებს", - ნათქვამია პრეზიდენტის ადმინისტარციის მიერ გავრცელებულ განცხადებაში.
შეგახსენებთ, ტელეკომპანია "მთავარმა არხმა" გაავრცელა ინფორმაცია, რომ სალომე ზურაბიშვილი პირად დაცვას ეროვნული სამოსის ტარებას სთხოვდა.