საქართველოს პრეზიდენტმა სალომე ზურაბიშვილმა საშობაოდ 5 მსჯავრდებული შეიწყალა. ახალი ამბების სააგენტო "ჯი-ეიჩ-ენმა" წერილობით მიმართა პრეზიდენტის ადმინისტრაციას, თუ სისხლის სამართლის კოდექსის რომელი მუხლებით გასამართლებული მსჯავრდებულები შეიწყალა პრეზიდენტმა.
პრეზიდენტის ადმინისტრაციის ცნობით, შეწყალებული 5 მსჯავრდებულიდან სამი სასჯელს სასჯელაღსრულების დაწესებულებაში იხდიდა, 2 კი პრობაციონერი იყო.
შესაბამისად, პრეზიდენტის შეწყალების შედეგად, 3-მა მსჯავრდებულმა სასჯელაღსრულების დაწესებულებები 6 იანვარს დატოვა, 2 მსჯავრდებულს კი, პირობითი სასჯელი მოეხსნა.
შეწყალებული 5 მსჯავრდებულიდან 2 ქალია.
თავისუფლებააღკვეთილი მსჯავრდებულები:
177-ე მუხლის მე-2 და მე-3 ნაწილები - შეწყალებულია 2 პირი
დანაშაული: ქურდობა. ა) რამაც მნიშვნელოვანი ზიანი გამოიწვია; ბ) ჩადენილი სადგომში ან სხვა საცავში უკანონო შეღწევით, ისჯება შინაპატიმრობით ვადით ერთიდან ორ წლამდე ან თავისუფლების აღკვეთით ვადით სამიდან ხუთ წლამდე. 3. იგივე ქმედება, ჩადენილი: ა) წინასწარი შეთანხმებით ჯგუფის მიერ; ბ) არაერთგზის; გ) ბინაში უკანონო შეღწევით; დ) სატრანსპორტო საშუალების წინააღმდეგ.
180-ე მუხლის მე-2 ნაწილი - შეწყალებულია 1 პირი
დანაშაული: თაღლითობა. ა) ჩადენილი წინასწარი შეთანხმებით ჯგუფის მიერ; ბ) რამაც მნიშვნელოვანი ზიანი გამოიწვია, ისჯება ჯარიმით ან თავისუფლების აღკვეთით ვადით ოთხიდან შვიდ წლამდე.
პირობით მსჯავრდებულები
19-177-ე მუხლი - შეწყალებულია 1 პირი. დანაშაული: ქურდობის მცდელობა.
344-ე მუხლის პირველი ნაწილი - შეწყალებულია 1 პირი. დანაშაული: საქართველოს სახელმწიფო საზღვრის უკანონოდ გადაკვეთა, ისჯება ჯარიმით ან თავისუფლების აღკვეთით ვადით სამიდან ხუთ წლამდე.
