ახლო აღმოსავლეთში განვითარებულ მოვლენებთან დაკავშირებით, ევროკომისიის პრეზიდენტმა ურსულა ფონ დერ ლაიენმა და ევროკავშირის უმაღლესმა წარმომადგენელმა საგარეო პოლიტიკისა და უსაფრთხეობის საკითხებში ჟოზეფ ბორელმა ერთობლივი პრესკონფერენცია გამართეს.
ურსულა ფონ დერ ლაიენი რეგიონში არსებულ აქტორებს დიალოგისა და სიტუაციის დეესკალაციისკენ მოუწოდებს.
"უნდა შეწყდეს იარაღის გამოყენება და ადგილი დაეთმოს დიალოგს. მოვუწოდებთ ყველას, გამოიყენონ ყველა შესაძლებლობა, რათა განახლდეს მოლაპარაკებები.
ვითარების დეესკალაციის მიზნით, ჩვენ დავამყარეთ დროთა განმავლობაში ნაცადი ურთიერთობები რეგიონის სხვადასხვა აქტორთან", - თქვა ფონ დერ ლაიენმა.
რამდენიმე საათის წინ, ირანმა ერაყში ამერიკულ სამხედრო ბაზებზე სარაკეტო იერიში მიიტანა.
დიდი ბრიტანეთი კანადა, ავსტრალია და ახალი ზელანდია აცხადებენ, რომ ირანის მიერ განხორციელებული სარაკეტო დარტყმების შედეგად მათი სამხედროები არ დაშავებულან.
დაზარალებულთა ან დაღუპულთა შესახებ ინფორმაცია არც პენტაგონს გაუვრცელებია.
შეერთებულ შტატებსა და ირანს შორის დაძაბულობის ახალი ტალღა ირანელი გენერლის ყასემ სულეიმანის მკვლელობას მოჰყვა.
ერაყის დედაქალაქ ბაღდადში, აეროპორტის სიახლოვეს, შეერთებული შტატების მიერ განხორციელებული სარაკეტო დარტყმის დროს, მოკლეს ირანის ისლამური რევოლუციის გუშაგთა კორპუსის ერთ-ერთი ელიტარული ქვედანაყოფის "ყუდსის" ლიდერი, გენერალი ყასემ სულეიმანი.
გენერალ სულეიმანის მკვლელობის გამო ირანში 3-დღიანი გლოვა განაცხადა. ქვეყნის უზენაესმა ლიდერმა აიათოლა ალი ხამენეიმ განაცხადა, რომ ირანი ყასემ სულეიმანის გამო შურს იძიებს.