დიდი ბრიტანეთის საგარეო საქმეთა მინისტრმა დომინიკ რააბმა დაგმო ირანის მიერ ბალისტიკური სარაკეტო შეტევა ერაყში განთავსებულ სამხედრო ბაზებზე, სადაც იმყოფებიან კოალიციური ძალები, მათ შორის ბრიტანელი პერსონალი. იტყობინება BBC-ი.
საგარეო საქმეთა მინისტრმა მოუწოდა ირანს, არ გაიმეოროს "დაუფიქრებელი და საშიში თავდასხმები" ირბილისა და ალ-ასადის სამხედრო ბაზებზე.
დიდი ბრიტანეთის თავდაცვის სამინისტროში აცხადებენ, რომ თავდასხმას ბრიტანელთა მსხვერპლი არ გამოუწვევია.
რამდენიმე საათის წინ, ირანმა ერაყში ამერიკულ სამხედრო ბაზებზე სარაკეტო იერიში მიიტანა.
ირანული ტელეკომპანიის Press TV-ის ინფორმაციით, "ისლამური რევოლუციის გუშაგთა კორპუსის" მიერ განხორციელებულ სარაკეტო იერიშს 80 ამერიკელი სამხედრო ემსხვერპლა.
კანადა, ავსტრალია და ახალი ზელანდია აცხადებენ, რომ ირანის მიერ განხორციელებული სარაკეტო დარტყმების შედეგად მათი სამხედროები არ დაშავებულან.
დაზარალებულთა ან დაღუპულთა შესახებ ინფორმაცია არც პენტაგონს გაუვრცელებია.
შეერთებულ შტატებსა და ირანს შორის დაძაბულობის ახალი ტალღა ირანელი გენერლის ყასემ სულეიმანის მკვლელობას მოჰყვა.
ერაყის დედაქალაქ ბაღდადში, აეროპორტის სიახლოვეს, შეერთებული შტატების მიერ განხორციელებული სარაკეტო დარტყმის დროს, მოკლეს ირანის ისლამური რევოლუციის გუშაგთა კორპუსის ერთ-ერთი ელიტარული ქვედანაყოფის "ყუდსის" ლიდერი, გენერალი ყასემ სულეიმანი.
გენერალ სულეიმანის მკვლელობის გამო ირანში 3-დღიანი გლოვა განაცხადა. ქვეყნის უზენაესმა ლიდერმა აიათოლა ალი ხამენეიმ განაცხადა, რომ ირანი ყასემ სულეიმანის გამო შურს იძიებს.