ირანის ისლამური რევოლუციის გუშაგთა კორპუსის მეთაური ჰოსეინ სალამი იმუქრება, რომ "დაწვავს" იმ ადგილებს, რომლებიც აშშ-ის დახმარებითა და მხარდაჭერით სარგებლობენ.
აღნიშნული განცხადება ჰოსეინ სალამიმ ქერმანში, გენერალ ყასემ სულეიმანის დაკრძალვის ცერემონიალზე გააკეთა.
სალამის გამოსვლას ცერემონიაზე მყოფი ადამიანების შეძახილი მოჰყვა "სიკვდილი ისრაელს".
"ჩვენ შურს ვიძიებთ. დავწვავთ იმ ადგილებს, რაც მათ მოსწონთ", - თქვა სალამიმ და დასძინა "სიკვდილი ისრაელს!".
ჰოსეინ სალამიმ დაკრძალვის ცერემონიალზე გენერალ სულეიმანის მნიშვნელობაზე ისაუბრა და განაცხადა, რომ მისი მასშტაბის ფიგურა კაცობრიობას არ ახსოვს.
დაკრძალვის ცერემონია გენერალ სულეიმანის მშობლიურ ქალაქ ქერმანში მიმდინარეობს.
გენერალი სულეიმანი დონალდ ტრამპის ბრძანებით 3 იანვარს, ერაყის დედაქალაქ ბაღდადში, ამერიკული სარაკეტო იერიშის შედეგად მოკლეს.