შეერთებულმა შტატებმა ირანის საგარეო საქმეთა მინისტრს მოჰამედ ჯავად ზარიფს უარი უთხრა. იტყობინება "ამერიკის ხმა".
მედიის ცნობით, მოჰამედ ჯავად ზარიფი ნიუ იორკში, გაეროს უსაფრთხოების საბჭოს სხდომას უნდა დასწრებოდა, რომელიც 9 იანვარს არის დაგეგმილი.
გაეროში ირანის მუდმივმოქმედი წარმომადგენლობის განცხადებით, მათ აღნიშნული ინფორმაცია მედიის საშუალებით შეიტყვეს და ოფიციალური ცნობა ჯერჯერობით არ მიუღიათ.
გაეროს შეთანხმებით, მასპინძელი ქვეყანა, ანუ ამერიკის შეერთებული შტატები ვალდებულია, უზრუნველყოს დიპლომატების შეუფერხებელი მონაწილეობა გაეროსა და მისი დაწესებულებების მუშაობაში, მიუხედავად მთავრობებს შორის ურთიერთობებისა.
საპასუხოდ, ვაშინგტონი თვლის, რომ შეუძლია უარი თქვას ამ წესის შესრულებაზე, "უსაფრთხოების, ტერორიზმისა და საგარეო პოლიტიკის საკითხების" გათვალისწინებით.
აშშ-ის სახელმწიფო დეპარტამენტმა და გაეროს პრესსპიკერმა უარი თქვეს ვიზასთან დაკავშირებული საკითხის კომენტირებაზე.
შეერთებულ შტატებსა და ირანს შორის დაძაბულობის ახალი ტალღა ირანელი გენერლის ყასემ სულეიმანის მკვლელობას მოჰყვა.
ერაყის დედაქალაქ ბაღდადში, აეროპორტის სიახლოვეს, შეერთებული შტატების მიერ განხორციელებული სარაკეტო დარტყმის დროს, მოკლეს ირანის ისლამური რევოლუციის გუშაგთა კორპუსის ერთ-ერთი ელიტარული ქვედანაყოფის "ყუდსის" ლიდერი, გენერალი ყასემ სულეიმანი.
გენერალ სულეიმანის მკვლელობის გამო ირანში 3-დღიანი გლოვა განაცხადა. ქვეყნის უზენაესმა ლიდერმა აიათოლა ალი ხამენეიმ განაცხადა, რომ ირანი ყასემ სულეიმანის გამო შურს იძიებს.