ერაყში განვითარებული ბოლოდროინდელი მოვლენების გამო, ბრიუსელში ნატოს საგანგებო სხდომა ჩატარდა, რომლის დასრულების შემდეგ ალიანსის გენერალურმა მდივანმა იენს სტოლტენბერგმა ბრიფინგი გამართა.
"დღევანდელი სხდომის შემდეგ, მოკავშირეები კიდევ ერთხელ მოვუწოდებთ თავშეკავებისა და სიტუაციის დეესკალაციისკენ. ახალი კონფლიქტის წარმოშობა არავის ინტერესებში არ შედის. შესაბამისად, ირანმა თავი უნდა შეიკავოს ძალადობისა და პროვოკაციებისგან", - განაცხადა სტოლტენბერგმა.
მას შემდეგ რაც, შეერთებული შტატების საჰაერო იერიშის შედეგად, ბაღდადში, ირანელი გენერალი ყასემ სულეიმანი მოკლეს, ერაყმა დაარღვია შეთანხმება საერთაშორისო ანტიტერორისტული კოალიციის ჯარების მის ტერიტორიაზე განლაგების შესახებ და უცხო ქვეყნის ჯარების გაყვანა მოითხოვა.
გასულ კვირას, ნატომ ერაყის ტერიტორიაზე სამხედრო სწავლების დროებით შეჩერების გადაწყვეტილება მიიღო.