გერმანიის ფედერაციული რესპუბლიკის კანცლერი ანგელა მერკელი, რუსეთის პრეზიდენტის მიწვევით, 11 იანვარს მოსკოვს სამუშაო ვიზიტით ეწვევა. იტყობინება კრემლის პრესსამსახური.
პრესსამსახურის ცნობით, მერკელი და პუტინი ახლო აღმოსავლეთში განვითარებულ მოვლენებზე იმსჯელებენ.
"შეხვედრაზე განხილული იქნება ასევე უკრაინის აღმოსავლეთით მიმდინარე კონფლიქტი, მინსკის 2015 წლის შეთანხმებით გათვალისწინებული საკითხები და პარიზის 2019 წლის 9 დეკემბრის ნორმანდიული ოთხეულის შეხვედრაზე მიღწეული შეთანხმებები", - ნათქვამია პრესსამსახურის განცხადებაში.
სიტუაცია ახლო აღმოსავლეთში განსაკუთრებით მას შემდეგ გამწვავდა, რაც ბაღდადში, ამერიკული სამხედრო ოპერაციის დროს მოკლულ იქნა ირანის ისლამური რევოლუციის გუშაგთა კორპუსის "ყუდსის" ქვედანაყოფის ლიდერი, გენერალი ყასემ სულეიმანი.
პენტაგონის განცხადებით, ოპერაცია თავდაცვითი ხასიათისა იყო და იგი მიზნად ისახავდა ახლო აღმოსავლეთში განლაგებული ამერიკელი სამხედროების დაცვას.