შეერთებული შტატების პრეზიდენტი დონალდ ტრამპი ერაყს სანქციების დაწესებით ემუქრება.
"თუ ერაყი გააგრძელებს ამერიკის შეერთებული შტატების მიმართ მტრული დამოკიდებულების გამომჟღავნებას, ჩვენ მათ ძალიან სერიოზულ სანქციებს დავუწესებთ", - ამბობს ტრამპი.
მისივე თქმით, სანქციები იმდენად სერიოზული იქნება, რომ ირანისთვის დაწესებული სანქციები "წვრილმანად მოეჩვენებათ".
როგორც დონალდ ტრამპი აცხადებს, აშშ-ს ერაყში ძვირადღირებული სამხედრო-საჰაერო ბაზა აქვს, რომლის მშენებლობაზე ამერიკის ბიუჯეტიდან მრავალი მილიარდი დოლარი დაიხარჯა.
"ამერიკელი სამხედროები არ აპირებენ ერაყის დატოვებას, სანამ ერაყელები არ გადაიხდიან იმ ფულს, რაც დავხარჯეთ", - დასძინა ტრამპმა.
მას შემდეგ რაც, შეერთებული შტატების საჰაერო იერიშის შედეგად, ბაღდადში, ირანელი გენერალი ყასემ სულეიმანი მოკლეს, ერაყმა დაარღვია შეთანხმება საერთაშორისო ანტიტერორისტული კოალიციის ჯარების მის ტერიტორიაზე განლაგების შესახებ და უცხო ქვეყნის ჯარების გაყვანა მოითხოვა.
შესაბამისი რეზოლუცია ერაყის პარლამენტმა გუშინ მიიღო.