ირანის საგარეო საქმეთა მინისტრმა მოჰამედ ჯავად ზარიფმა აშშ-ის სახელმწიფო მდივანს მაიკ პომპეოს "ქედმაღალი ჯამბაზი" უწოდა. ამის შესახებ ირანელმა დიპლომატმა მიკრობლოგ "ტვიტერზე" დაწერა.
"24 საათის წინ, ქედმაღალმა ჯამბაზმა, რომელიც თავს დიპლომატს უწოდებს, განაცხადა, რომ ერაყის ქუჩებში ხალხი ცეკვავდა. დღეს ამას პასუხი ასობით ათასმა ჩვენმა ერაყელმა ძმამ და დამ გასცა. დასავლეთ აზიაში ამერიკის მტრული ყოფნის დასასრულის დრო დადგა", - დაწერა მოჰამედ ჯავად ზარიფმა.
მანამდე მაიკ პომპეომ მიკრობლოგ "ტვიტერზე" დაწერა, რომ ერაყელები ყასემ სულეიმანის ლიკვიდაციას ზეიმობდნენ და ქუჩაში ცეკვავდნენ.
შეერთებულ შტატებსა და ირანს შორის დაძაბულობის ახალი ტალღა ირანელი გენერლის ყასემ სულეიმანის მკვლელობას მოჰყვა.
ერაყის დედაქალაქ ბაღდადში, აეროპორტის სიახლოვეს, შეერთებული შტატების მიერ განხორციელებული სარაკეტო დარტყმის დროს, მოკლეს ირანის ისლამური რევოლუციის გუშაგთა კორპუსის ერთ-ერთი ელიტარული ქვედანაყოფის "ყუდსის" ლიდერი, გენერალი ყასემ სულეიმანი.
გენერალ სულეიმანის მკვლელობის გამო ირანში 3-დღიანი გლოვა განაცხადა. ქვეყნის უზენაესმა ლიდერმა აიათოლა ალი ხამენეიმ განაცხადა, რომ ირანი ყასემ სულეიმანის გამო შურს იძიებს.