შეერთებული შტატების პრეზიდენტის დონალდ ტრამპის თქმით, თუ ირანი შურისძიებას გადაწყვეტს, ამერიკის რეაქცია იქნება "სწრაფი და ძლიერი". ამის შესახებ ტრამპი მიკრობლოგ "ტვიტერზე" წერს.
"მიიღეთ ეს როგორც გაფრთხილება. თუ ირანი გადაწყვეტს, თავს დაესხას ამერიკელებს ან ამერიკის სამხედრო ბაზებს, ჩვენ შევარჩიეთ 52 ირანული ობიექტი, რომლებიც ძალიან მნიშვნელოვანია ირანისა და მისი კულტურისთვის.
ჩვენი რეაქცია იქნება სწრაფი და ძლიერი. აშშ-ს არ სურს მუქარების მოსმენა", - დაწერა ტრამპმა.
თავისივე განცხადებაში დონალდ ტრამპმა განმარტა თუ რატომ შეირჩა 52 ირანული ობიექტი. მისი თქმით, 52 ირანული ობიექტი განასახიერებს იმ 52 ამერიკელს, რომელიც ირანმა მძევლად აიყვანა ისლამური რევოლუციის დროს.
ამერიკელი მძევლები ირანის რეჟიმს 444 დღე ჰყავდა დატყვევებული.
შეერთებულ შტატებსა და ირანს შორის დაძაბულობის ახალი ტალღა ირანელი გენერლის ყასემ სულეიმანის მკვლელობას მოჰყვა.
ერაყის დედაქალაქ ბაღდადში, აეროპორტის სიახლოვეს, შეერთებული შტატების მიერ განხორციელებული სარაკეტო დარტყმის დროს, მოკლეს ირანის ისლამური რევოლუციის გუშაგთა კორპუსის ერთ-ერთი ელიტარული ქვედანაყოფის "ყუდსის" ლიდერი, გენერალი ყასემ სულეიმანი.
გენერალ სულეიმანის მკვლელობის გამო ირანში 3-დღიანი გლოვა განაცხადა. ქვეყნის უზენაესმა ლიდერმა აიათოლა ალი ხამენეიმ განაცხადა, რომ ირანი ყასემ სულეიმანის გამო შურს იძიებს.