ამერიკის შეერთებული შტატების სახელმწიფო მდივანი მაიკ პომპეო უკმაყოფილოა ევროპელი მოკავშირეების რეაქციით, რაც აშშ-ის მიერ ირანელი გენერლის ყასემ სულეიმანის განადგურებას მოჰყვა.
აღნიშნულთან დაკავშირებით მაიკ პომპეომ ტელეკომპანია Fox News-სთან ინტერვიუს დროს განაცხადა. იუწყება Politico-ს ამერიკული გამოცემა.
"ბრიტანელებს, ფრანგებს, გერმანელებს, ყველას კარგად უნდა ესმოდეს, რომ იმან, რაც ჩვენ გავაკეთეთ, ისხნა მრავალთა სიცოცხლე ევროპაშიც", - დასძინა მაიკ პომპეომ.
მაიკ პომპეოს თქმით, ვიდრე სულეიმანის ლიკვიდაცია მოხდებოდა, შეერთებული შტატები ესაუბრა ევროპელ პარტნიორებს, თუმცა ისინი მზად არ აღმოჩნდნენ დასახმარებლად.
"გულწრფელად რომ ვთქვათ, ვისურვებდი, ევროპელი მოკავშირეები მეტად დაგვხმარებოდნენ", - თქვა მაიკ პომპეომ.
ასევე, სახელმწიფო მდივანმა ისაუბრა ახლო აღმოსავლეთში ამერიკის მოკავშირეთა რეაქციების შესახებ და აღნიშნა, რომ უმეტესი მათგანი "შესანიშნავი" იყო, ზოგიერთი კი "არც ისე კარგი".
გუშინ ცნობილი გახდა, რომ ერაყის დედაქალაქ ბაღდადში, აეროპორტის სიახლოვეს, შეერთებული შტატების მიერ განხორციელებული სარაკეტო დარტყმის დროს, მოკლეს ირანის ისლამური რევოლუციის გუშაგთა კორპუსის ერთ-ერთი ელიტარული ქვედანაყოფის "ყუდსის" ლიდერი, გენერალი ყასემ სულეიმანი.
გენერალ სულეიმანის მკვლელობის გამო ირანში 3-დღიანი გლოვა განაცხადა. ქვეყნის უზენაესმა ლიდერმა აიათოლა ალი ხამენეიმ განაცხადა, რომ ირანი ყასემ სულეიმანის გამო შურს იძიებს.
31 დეკემბერს ბაღდადში საპროტესტო აქციის მონაწილეები თავს დაესხნენ ერაყში შეერთებული შტატების საელჩოს და მის ტერიტორიაზე შეჭრას შეეცადნენ. თუმცა მათი მოგერიება მოახერხეს ამერიკელმა სამხედროებმა.
საპროტესტო აქციის მონაწილეები გმობენ აშშ-ის მიერ ერაყში განთავსებულ "ჰეზბოლას" ობიექტებზე განხორციელებულ ავიაიერიშს, რომელსაც 25 ადამიანი ემსხვერპლა.
აშშ-ის საელჩომ ბაღდადში, საპროტესტო აქციების გამო, მუშაობა შეწყვიტა.
