სასტუმროთა ქსელი IHG საქართველოში კიდევ ერთი ბრენდით Hotel Indigo იქნება წარმოდგენილი. ბათუმში საქართველოს ეროვნული ბანკის (სებ) ყოფილ შენობაში, რომელიც მემედ აბაშიძის ქუჩა N25 მდებარეობს, 2020 წლის ბოლოსთვის სასტუმრო Indigo გაიხსნება. ფრანშიზის შეთანხმება "სტარ კაპიტალსა" და სასტუმროს ბრენდს შორის უკვე შედგა. Indigo-სთვის ბათუმი მეოცე საერთაშორისო ბაზარია.
თავად "სტარ კაპიტალმა" კი ისტორიული ნაგებობა 2017 წლის ნოემბერში პირობებიან აუქციონზე 9.2 მლნ ლარად შეიძინა. კომპანიაში განმარტავენ, რომ Hotel Indigo-ს მშენებლობაში 12-13 მლნ ლარის ინვესტიცია განხორციელდება.
Hotel Indigo Batumi, რომელიც მე-19 საუკუნის შენობაში განთავსდება, 72 სასტუმრო ნომერზე იქნება გათვლილი.
როგორც IHG-ში განმარტავენ, აჭარაში მათი ქვებრენდებით 3 სასტუმროს მშენებლობაზეა შეთანხმება მიღწეული.
"სტარ კაპიტალის" ინფორმაციით, მათმა ჯგუფმა ვალდებულება აიღო და უახლოესი 3 წლის განმავლობაში IHG-ის ქვებრენდით - Crowne Plaza-ს 2 სასტუმრო მახინჯაურში აშენდება.
Crowne Plaza-დან ერთ-ერთი მახინჯაურში, ყოფილი სანატორიუმების შენობაში განთავსდება და ის სტუმრების მიღებას 2021 წლიდან შეძლებს. აღნიშნული პროექტი სასტუმროს გარდა აპარტოეტელების მშენებლობასაც ითვალისწინებს.
რაც შეეხება მეორე Crowne Plaza-ს, ის მახინჯაურში გოგირდის აბანოების ნაცვლად აშენდება და ბალნეოლოგიურ მიმართულებას შეინარჩუნებს. მისი გახსნა 2022 წლისთვის იგეგმება.
"სტარ კაპიტალის" ინფორმაციით, ორივე Crowne Plaza-ს მშენებლობა ინვესტორს 30 მლნ დოლარი დაუჯდება.
შეგახსენებთ, რომ Hotel Indigo ბუტიკის ტიპის სასტუმროა, რომელიც IHG-ის წევრია. 2019 წლის აპრილის მონაცემებით, ბრენდი მთელი მსოფლიოს მასშტაბით 102 სასტუმროს მართავს და მის მომხმარებლებს 12,749 ოთახს სთავაზობს. Hotel Indigo-ს პირველი სასტუმრო 2004 წლის ოქტომბერში ატლანტაში გაიხსნა.