200 წლის განმავლობაში პირველად, პარიზის ღვთისმშობლის ტაძარში საშობაო ლიტურგია არ შესრულდება.
850 წლის გოთიკური ტაძარი, პარიზის სიმბოლო და იუნესკოს მსოფლიო კულტურული მემკვიდრეობის ძეგლი აპრილში გაჩენილმა ხანძარმა მნიშვნელოვნად დააზიანა.
ნაცვლად ნოტრ-დამისა, საშობაო ლიტურგია ლუვრის მიმდებარედ, სენ-ჟერმენ ლ’ოქსერუას ტაძარში გაიმართება.
საფრანგეთის პრეზიდენტის ემანუელ მაკრონის განცხადებით, ნოტრ-დამის რეკონსტრუქციისთვის 5-წლიანი ვადა განისაზღვრა.
ოქტომბერში, საფრანგეთის კულტურის მინისტრმა თქვა, რომ რეკონსტრუქციისთვის 1 მლრდ ევროს მობილიზება მოხერხდა.
პარიზის ღვთისმშობლის ტაძარს ცეცხლი 15 აპრილს, გაუჩნდა. 400-მდე მეხანძრე მის ლოკალიზებას ცხრა საათის განმავლობაში ცდილობდა.
ხანძრის შედეგად, ტაძრის ხის სახურავი მთლიანად დაიწვა, თუმცა მეხანძრეებმა პარიზის ღვთისმშობლის ტაძრის სტრუქტურის სრული განადგურებისგან გადარჩენა შეძლეს.
ხანძარს გადაურჩა პარიზის ღვთისმშობლის ტაძრის ფერადი სარკმელები. გადარჩენილია მთავარი რელიკვიები - მაცხოვრის ეკლის გვირგვინი და წმინდა ლუის ტუნიკა, საკურთხეველი და საკურთხევლის ჯვარი.