ევროკავშირის საბჭომ ოფიციალურად გაახანგრძლივა, ჯერ კიდევ ევროკავშირის სამიტის ფარგლებში შეთანხმებული, რუსეთის წინააღმდეგ ეკონომიკური სანქციები ექვსი თვის ვადით - 2020 წლის 31 ივლისამდე.
სანქციები გავრცელდება ფინანსური, ენერგეტიკისა და თავდაცვის სექტორებზე.
ევროკავშირის საბჭოს განმარტებით, სანქციების გახანგრძლივების შესახებ გადაწყვეტილება მინსკის შეთანხმების პირობების შეუსრულებლობის გამო მიიღეს.
"იმის გათვალისწინებით, რომ მინსკის შეთანხმების პირობები ბოლომდე არ არის შესრულებული, ევროკავშირის საბჭომ ერთხმად მიიღო გადაწყვეტილება რუსეთის წინააღმდეგ ეკონომიკური სანქციების გახანგრძლივების შესახებ", - აღნიშნულია ოფიციალურ პრესრელიზში.
მანამდე, ევროკავშირის საბჭოს პრეზიდენტმა შარლ მიშელმა განაცხადა, რომ ევროკავშირის სამიტის ფარგლებში, ლიდერებმა მოისმინეს "ნორმანდიული სამიტის" შედეგების შესახებ მაკრონისა და მერკელის მოხსენება და ამის შემდეგ მიიღეს გადაწყვეტილება.
გადაწყვეტილება ევროკავშირის ოფიციალურ ჟურნალში გამოქვეყნების შემდეგ შევა ძალაში.
რუსეთის წინააღმდეგ სანქციები მას შემდეგ მოქმედებს, რაც მან უკრაინის კუთვნილი ყირიმის ნახევარკუნძულის ანექსია მოახდინა.