ვენის სახელმწიფო ოპერის თეატრის ბალეტის აკადემია მოსწავლეევს წონის გაკონტროლების მიზნით მოწევისკენ უბიძგებდა.
ამის შესახებ ნათქვამია სპეციალური საგამოძიებო კომისიის დასკვნაში, რომელიც აკადემიაში მოსწავლეთა კეთილდღეობის წინააღმდეგ მიმართულ დარღვევებს სწავლობს.
გამოძიების შედეგების მიხედვით, აკადემიური პერსონალი მოსწავლეების მიმართ მეტად მკაცრ მეთოდებს იყენებდა, რის გამოც ისინი დიდი ფიზიკური დატვირთვის ქვეშ იმყოფებოდნენ.
"ნათელია, რომ ბავშვები და მოზარდები საკმარისად არ არიან დაცული დისკრიმინაციისგან, უგულებელყოფისა და უარყოფითი სამედიცინო შედეგებისგან", - ნათქვამია კომისიის დასკვნაში.
ბრალდების საპასუხოდ ვენის სახელმწიფო ოპერამ განაცხადა, რომ შეამცირა მოზარდთა მონაწილეობით წარმოდგენების რაოდენობა და ამავდროულად, სრულად შეისწავლის საგამოძიებო კომისიის დასკვნას.
ბალეტის აკადემიაში არსებული ვითარების შესახებ თავდაპირველად ინფორმაცია ერთ-ერთ ავსტრიულ გამოცემაში გამოქვეყნდა, სადაც საუბარი იყო აკადემიის სწავლების მკაცრი მეთოდების შესახებ.
გამოცემა წერდა, რომ მოსწავლეები რეგულარულად განიცდიდნენ დამამცირებელ მოპყრობას.
ავსტრიის კულტურის მინისტრმა, ამ ინფორმაციის გამჟღავნებისთანავე, პრობლემების შესწავლა და მისი აღმოფხვრის მექანიზმების შექმნა მოითხოვა.
აკადემია, რომელიც 1771 წელს შეიქმნა, ევროპის ერთ-ერთ ყველაზე პრესტიჟული საბალეტო სკოლაა. მისი კურსდამთავრებულები წარმატებით მოღვაწეობენ ისეთ სახელგანთქმულ საბალეტო თეატრებში, როგორებიცაა ლონდონის სამეფო ბალეტი და ნიუ იორკის ამერიკული ბალეტის თეატრი.