რამდენად შეესაბამებოდა ქართველთა ეროვნულ ინტერესებს ლავრენტი ბერიას მიერ გატარებული პოლიტიკა, ამის გარკვევას სტუ-ს სამართლისა და საერთაშორისო ურთიერთობების ფაკულტეტის იმიტირებულ სამსჯავროზე შეეცადა მე-3 მეოთხედფინალის ორი უფროსკლასელთა გუნდი.
ბრალდების მხარეს წარმოდგენდა გუნდი "პენსნე", რომელშიც გაერთიანებულია კერძო სკოლა "ახალი ლიცეუმის" მოსწავლეები: ელენე ლაშაქარაძე (კაპიტანი), ანა აბულაძე, ელენე გოგეშვილი, ანი კობაიძე, ვახტანგ ლუაშვილი, მარიამ ჯოხაძე და გიორგი ძიძიგური. მენტორები: საერთაშორისო ურთიერთობების მიმართულებით, პროფესორი ეკა ბუხრაშვილი; სამართლის მიმართულებით, პროფესორი მაკა აბულაძე; პედაგოგი ეკა ბუხრაშვილი; პოლიტსამსჯავროელი სტუდენტი მენტორი მარიამ ნოზაძე.
დაცვის მხარეს კი - 127-ე საჯარო სკოლის უფროსკლასელებით დაკომპლექტებული გუნდი "სამართლიანობის მახვილი": თამარ კალანდია (კაპიტანი), გიორგი ადამაშვილი, ქეთევან დურგლიშვილი, თორნიკე ექიზაშვილი, ქრისტინე ოგანეზოვი, თამარ სირაძე და შალვა ქევხიშვილი. მენტორები: საერთაშორისო ურთიერთობების მიმართულებით, პროფესორი ლევან ოსიძე; სამართლის მიმართულებით, პროფესორი ლელა წიკლაური. პედაგოგი: მაიკო ჯუღაშვილი; პოლიტსამსჯავროელი სტუდენტი მენტორი ანა ნაკაშია.
იმიტირებულ პროცესზე საბრძოლო განწყობით დამდგარი გუნდები დარწმუნებულნი იყვნენ მოპოვებული ისტორიული წყაროების მათ მიერ გაკეთებული პოლიტიკური ანალიზის უტყუარობაში და არგუმენტების სიძლიერეში.
ვერდიქტის გამოსატანად ცალკე ოთახში შეიკრიბენ ნაფიცი მსაჯულები: ზურაბ გასიტაშვილი (სამსჯავროს თავმჯდომარე, სტუ-ს რექტორის მოადგილე მეცნიერების დარგში, ტექნიკის მეცნიერებათა დოქტორი, პროფესორი); ჯემალ გაბელია (ფაკულტეტის დეკანის მოადგილე, სამართლის დოქტორი, პროფესორი); თეონა აქუბარდია (საქართველოს სტრატეგიული ანალიზის ცენტრის დამფუძნებელი. ყოფილი ეროვნული უშიშროების საბჭოს მდივნის მოადგილე); მანანა დარჩაშვილი (ფაკულტეტის პოლიტიკისა და საერთაშორისო ურთიერთობების აკადემიური დეპარტამენტის უფროსის მოადგილე, პროფესორი); ნინო ოდიშელიძე (სასწავლო-სამეცნიერო კვლევითი პროექტის "პოლიტიკა სამსჯავროზე" მენეჯერ-კოორდინატორი); გოდერძი შარაშია (ტელეკომპანია "იმედის" რეჟისორი და ჟურნალისტი); რუსა შელია (თოქ-შოუ "360 გრადუსი" წამყვანი, ახალი ამბების ტელევიზია "პალიტრანიუსი").
მათ უნდა შეეფასებინათ მენტორებისა და გუნდების ერთობლივი ნამუშევარი, უფროსკლასელების მიერ შეძენილი უნარ-ჩვევები: 1. გავლილი მასტერკლასების (ტრენინგების) ათვისების, კვლევითი მუშაობის, არქივებში, ბიბლიოთეკებსა და სამეცნიერო კატალოგებში მოძიებული წყაროების (წერილობითი, ფოტო და ფონო დოკუმენტური...), სხვა მასალების, მტკიცებულებებისა და სანდო ინფორმაციის ანალიზისა და გამოყენების უნარი; 2. სახელმწიფო (ეროვნული) ინტერესების კრიტერიუმებისა და პარამეტრების, ასევე საკუთარი პოზიციის მყარად არგუმენტირების უნარი; 3. მხარეთა პაექრობის, სასამართლო პროცესზე მონაწილეობის უნარ-ჩვევა, ასევე, საჯარო გამოსვლისა და დებატების ხელოვნება; ქცევისა და ურთიერთობის ეთიკა; გუნდურობა და სხვ.
ერთი ქულის უპირატესობით ნახევარფინალში გადავიდა გუნდი "სამართლიანობის მახვილი".
"მეორე სეზონია ფაკულტეტზე წარმატებით ხორციელდება სასწავლო-სამეცნიერო კვლევითი პროექტი "პოლიტიკა სამსჯავროზე" საუნივერსიტეტო, უნივერსიტეტშორისი, სასკოლო, ინგლისურენოვან და რუსულენოვან ფორმატში. ფაკულტეტი ორიენტირებულია მაღალკვალიფიციური, მრავალმხრივად განვითარებული სპეციალისტის მომზადებაზე და ამაში, ფაკულტეტზე განხორციელებულ სხვა სამეცნიერო-კვლევით პროექტებთან ერთად, ნამდვილად გამორჩეულია ე.წ. „პროფ. კუპრაშვილის პროექტი“, რომელიც ყოველმხრივ ხელსუწყობს სტუდენტებმა შეიძინონ ზემოთ ჩამოთვლილი უნარ-ჩვევები", - აცხადებს საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტის დეკანი, პროექტის თანახელმძღვანელი, პროფესორი ირაკლი გაბისონია:
როგორც ჰენრი კუპრაშვილმა (პროექტის ავტორი და ხელმძღვანელი, პოლიტიკის მეცნიერებათა დოქტორი, პროფესორი) აღნიშნა: პროექტი, მოიცავს მხოლოდ სასწავლო-სამეცნიერო კვლევით პროცესს, სტუდენტები (უფროსკლასელები) იკვლევენ თუ რამდენად შეესაბამებოდა ცნობილი პოლიტიკური პირების (პოლიტიკური პარტიების) გატარებული პოლიტიკა ქვეყნის ეროვნულ ინტერესებს, შედეგების განსჯა კი ხდება იმიტირებულ სამსჯავროზე. იმიტირებული სასამართლო პროცესი გამოყენებულია, როგორც სტუდენტების (მოსწავლეების) მიერ შეძენილი მრავალმხრივი ცოდნისა და უნარების საინტერესოდ და სრულყოფილად გადმოცემის თვალსაჩინო და ეფექტური საშუალება, რომელსაც აფასებს კვალიფიციური ჟიური (ნაფიცი მსაჯულნი).
პროექტის მიზნები და ამოცანები სრულიად აპოლიტიკურია და გამორიცხავს მიმდინარე პოლიტიკურ-პარტიულ პროცესებთან პიროვნული თუ ორგანიზაციული სახით რაიმე შეხებას.
